Алматыда зейнеткер алаяқтардың арбауына түсіп, оларға қомақты қаржы аударғаннан кейін сол күні кешке көз жұмды. Бұл туралы оның туыстары мәлімдеді, – деп хабарлайды aqshamnews.kz тілшісі.
Марқұмның жақындарының айтуынша, ол 21 наурыз күні таңертең базарға барып, сол жерде алаяқтардың ықпалына түсуі мүмкін. Туыстарының болжамынша, белгісіз адамдар оны қала ішінде түрлі банкоматтарға апарып жүрген. Соның салдарынан қария сегіз адамның есепшотына шамамен 4 миллион теңге аударған.
Немересінің айтуынша, атасы біраз уақыт қоңырауларға жауап бермеген. Кейін телефонға бейтаныс ер адам жауап беріп, құрылғыны қарияның өзіне берген. Әңгіме барысында артқы жақтан бөгде дауыстар естілген.
Соңғы сөйлесу кезінде зейнеткер аялдамаға қарай бара жатқанын айтып, алаяқтарға тап болғанын растаған. Сол сәтте оның жағдайы күрт нашарлап, көшеде құлап қалған. Куәгерлер алғашқы көмек көрсетіп, жедел жәрдем шақырғанымен, ер адам дәрігерлер келгенге дейін көз жұмды.
Алматы қалалық полиция департаменті бұл дерек бойынша қылмыстық іс қозғалғанын хабарлады. Қазіргі уақытта күдіктілердің жеке басын анықтау және оларды ұстау бағытында жедел-іздестіру шаралары жүргізіліп жатыр.
Марқұмның немересі атасына көмектесуге тырысқан барлық адамдарға алғыс білдіріп, оқиғаға қатысты қандай да бір ақпарат білетіндерден хабарласуды сұрады.
Бұған дейін Ақмола облысының Қосшы қаласында да зейнеткер алаяқтардың құрбаны болған. Интернеттегі инвестициялық жобаға сенген әйел 10 миллион теңгеден айырылған.