Мұндай сайлау бұрын-соңды еліміздің тарихында болмаған.
Бүгін, 25 шілдеде, аудандық маңызы бар қалалардың, ауылдардың, кенттердің, ауылдық округтердің әкімдерінің тікелей сайлауы өтіп жатыр, деп хабарлайды Almaty-akshamy.kz
Сайлау 14 облыстағы 1847 сайлау учаскесінде өтуде. Аумақтық сайлау комиссияларының мәліметтері бойынша, 730 сайлау округінде 2 582 кандидат ұсынылған. Олардың ішінде 2 297 үміткер тіркеудің соңғы сәтінде тіркелген.
Үміткерлер құрамында: 1419 – өзін-өзі ұсыну жолымен, 878 – ҚР ӘМ тіркелген 6 саяси партиядан қатысады. Гендерлік құрам бойынша: ерлер – 1839, әйелдер – 458.
Қазақстан Республикасының Президенті Қасым-Жомарт Тоқаевтың 2020 жылғы 1 қыркүйектегі «Қазақстан жаңа нақты ахуалда: іс-қимыл уақыты» атты ел халқына Жолдауында 2021 жылдан бастап ауыл әкімдерінің тікелей сайлауын өткізу туралы тапсырма берген болатын.
Бұл бастама жергілікті өзін-өзі басқару институттарының жаппай практикасын енгізу арқылы мемлекеттік басқаруды орталықсыздандыруға қатысты негізгі саяси реформалар пакетін дәйекті іске асыруға бағытталған.
Жергілікті басқару мен өзін-өзі басқаруды реформалау бірқатар стратегиялық міндеттерді шешуге бағытталған.
Біріншіден, жергілікті өзін-өзі басқару органдарын сайлауды ашық Мемлекеттік басқару қағидаты және «Халық үніне құлақ асатын мемлекет» тұжырымдамасын іске асыру негізінде енгізу.
Екіншіден, азаматтардың ауылдық аумақтарды дамытуға және жергілікті маңызы бар мәселелерді шешуге қатысуын кеңейту.
Үшіншіден, атқарушылық және заңнамалық өкілеттіліктерді төменгі деңгейге кезең-кезеңімен беру.
Төртіншіден, ауыл әкімдерін тікелей сайлау кезінде партиялардың өкілеттіліктерін кеңейту арқылы саяси бәсекелестікті дамыту.