Алқа отырысында Сыбайлас жемқорлыққа қарсы іс-қимыл агенттігінің Төрағасы Асхат Жұмағали өңірлерде жүргізіліп жатқан жемқорлыққа қарсы жұмыстың маңыздылығын атап өтті, деп хабарлайды аlmaty-akshamy.kz.
Аумақтық басшылар қалалар мен аудандардың өмірінде, тұрғындардың әл-ауқатын арттыруда шешуші рөл атқарады, сондай-ақ бюджет қаражатын бөлуді анықтайды. Олар жергілікті жерлерде мемлекеттік биліктің өкілдері болып табылады және олардың тарапынан кез-келген пайда күнемдік көріністері елдегі жемқорлықтың жай-күйі туралы халықтың бағалауын қалыптастырады. Осыған байланысты Сыбайлас жемқорлыққа қарсы қызмет жергілікті атқарушы органдар арасындағы жемқорлыққа қарсы іс-қимылға ерекше назар аударады. Ағымдағы жылы әкімдік қызметкерлеріне қатысты 203 қылмыс тіркелді, олар бойынша 144 адам әшкереленді.
Мәселен, Алматы қаласы бойынша Сыбайлас жемқорлыққа қарсы қызмет мәдениет басқармасы басшысының орынбасарына қатысты тергеуді аяқтады. Ол қызметтік өкілеттіктерін асыра пайдалану, бюджет қаражатын жымқырып және кәсіпкерлік қызметке заңсыз қатысқаны үшін күдіктелуде. Оның қылмыстық әрекеттерінің нәтижесінде мемлекетке 125 млн теңгеден астам сомаға материалдық залал келтірілді. Күдікті сотқа тартылды.
Қызылорда облысы бойынша Сыбайлас жемқорлыққа қарсы қызмет облыстық кәсіпкерлік және өнеркәсіп басқармасының басшысына қатысты сотқа дейінгі тергеуді аяқтады.
Ол ұлының оқуына ақы төлеу қажеттілігі және дизельді отынмен қамтамасыз ету туралы бизнес өкілдеріне заңсыз нұсқаулар беру арқылы лауазымдық өкілеттіктерін асыра пайдаланғаны үшін күдікті. Сонымен қатар, шенеунік өңір кәсіпорындарының сұйытылған газдың тиісті көлемін алу құқығын шектеу арқылы заңды кәсіпкерлік қызметке кедергі келтірді деп күдіктелуде. Соттың санкциясымен күдікті қамауға алынды. Қазіргі уақытта іс прокурорға жіберілді.
Айта кету керек, антикор жемқорлық әрекеттеріне тап болған азаматтарға үндеу жасады. Егер Сіз жемқорлық фактілеріне тап болсаңыз, @antikorkz_bot Telegram-боты немесе 1424 нөмірі арқылы шұғыл хабарлаңыз.