Қазір елімізде қарияларға құрмет көрсету айлығы кеңінен өтіп жатыр. Осынау парасаты мол мереке аясында Жетісу ауданындағы «Кемел» ықшамауданының «Мәдениет үйінде» қариялардың қатысуымен үлкен мереке өтті. Оны аудандағы «Белсенді ұзақ өмір сүру орталығының» ұйымдастырды. «Ал, кәнекей, әжелер» деп аталатын сайысты аудан тұрғындары мен жастар да қызыға тамашалады.
Сонымен аталмыш сайысқа «Белсенді ұзақ өмір сүру орталығының» тұрақты қатысушылары, яғги оның қызметін алушы қариялар қатысты. Әжелер «Беу-айдай!», «Алые сердца», «Зорьки», «Золотые ручки», «Скандинавочки» деп аталатын бес топ болып, өнерлерін ортаға салды.
Байқаудың бірінші кезеңінде әжелер өздерін жай ғана таныстырмай, бірнеше тіл меңгергенімен де жұртты таң қылды. Екінші кезеңде әжелер ән салып, монолог оқыды, араларынан мың бұралған бишілер шығып, тіпті қыздырып жіберді. Байқаудың үшінші кезеңінде әжелер білек сыбана кірісіп, тамақтың сан түрін жасады. Ең соңғы шешуші сайыста, әжелер ұлттық нақыштағы киіммен шығып, таңдай қақтырды. Жалпы, бұл жолғы сайысқа қатысушылардың осалы болмады. Содан да болар кіл мықтыларды анықтау қазылар алқасына да оңайға соқпады.
Сонымен, «Ал, кәнекей, әжелер!» сайысының Бас жүлдесін
«Беу-айдай» әжелер тобы иеленсе, бірінші орынды - «Золотые ручки»,
екінші орынды - «Алые сердца», үшінші орынды - «Зорьки» әжелер тобы лайық деп танылды. Сонымен қатар, «Ұйымшыл және белсенді» номинациясы «Скандинавочки» әжелер тобына бұйырды. Аудан қариялары осынау қарттар айлығы барысында қолдау көрсеткені үшін «Кемел» ықшамауданының «Белсенді ұзақ өмір сүру орталығының» директоры Гүлжазира Каныбековаға, «Талант-К» медициналық колледж директорыТалант Бақытбекұлына, «Сәби тілегі» қайырымдылық қорының төрайымы Нвзым Смағұловаға, «Рухты халық» қайырымдылық қорының төрайымы Ләззат Тұтқабекова зор ризашылықтарын білдірді.