Air Astana-ның бас директоры Питер Фостер 2026 жылы қызметінен кетеді, - деп хабарлайды aqshamnews.kz тілшісі.
Air Astana АҚ директорлар кеңесі компанияның бас атқарушы директоры және директорлар кеңесінің мүшесі Питер Фостер 2026 жылғы наурызда қызметінен кететінін хабарлады. Дегенмен ол компаниялар тобымен байланысын сақтап, директорлар кеңесіне аға кеңесші ретінде қызметін жалғастырады.
Фостердің орнына қазіргі қаржы жөніндегі атқарушы директор Ибрахим Жанлыел бас атқарушы директор болып тағайындалмақ.
Директорлар кеңесінің төрағасы Нұрлан Жақұпов Питер Фостердің компанияны 20 жыл бойы табысты басқарғанын атап өтті.
"Питер Фостер компанияны құрылған кезінен бастап Қазақстан мен Орталық Азияның жетекші әуе компаниясына, әлемдік деңгейде мойындалған брендке айналдырды. Оның еңбегі зор", – деді ол.
Айта кетейік, бұған дейін Мәжіліс депутаты Еділ Жаңбыршин Үкімет сағатында Air Astana АҚ бас атқарушы директоры Питер Фостерге ескерту жасады.
