BI Group басшысы Айдын Рахимбаев пен жұбайы Анар Рахимбаева The Giving Pledge – «Қайырымдылық антына» қол қойды, деп хабарлайды Aqshamnews.kz тілшісі.
Бұл бастамаға қосылғандар байлығының кемінде жартысын қайырымдылыққа бағыттауға міндеттеме алады.
Рахимбаевтардың айтуынша, олар капиталының жартысынан көбін әлеуметтік жобаларға жұмсауды жоспарлап отыр.
«Біз капиталымыздың жартысынан көбін кезең-кезеңімен қайырымдылыққа бағыттауға міндеттенеміз. Ал қалған бөлігін балаларымызға қалдырғымыз келеді. Бірақ жарты миллиард доллар да біз үшін шек емес. Көбірек табыс тапсақ, игі істерге де көбірек қаражат бөлеміз. Біз болашақ ұрпаққа пайдасы тиетін, ұзақ мерзімді әсері бар жобаларға инвестиция салғымыз келеді. Бұған дейін әлеуметтік жобаларға шамамен 100 млн доллар бөлдік. Балаларымыздың да бұл бастаманы қолдап, құндылықтарымызды бөлісетіні қуантады», – деді Айдын Рахимбаев.
Айдын және Анар Рахимбаевтар мамыр айының соңында өтетін The Giving Pledge қауымдастығының кезекті кездесуіне шақырылды. Сол жиында олардың «Қайырымдылық антына» қол қойып, Орталық Азиядан бұл бастаманы қолдаған алғашқы өкілдер атанғаны ресми жарияланады.
Айдын Рахимбаевтың сөзінше, негізгі басымдық Қазақстандағы жобаларға беріледі. Қаражат мектеп салуға, балалар үйлерін жабуға, Орталық Азиядағы балаларды қолдауға, ұлттық дәстүрлерді сақтауға және Қазақстан тарихын насихаттауға бағытталмақ.
Сарапшылар бұл шешім Қазақстандағы өзге де ірі кәсіпкерлердің қайырымдылық бастамаларына серпін беруі мүмкін екенін айтады.