AI & Digital Bridge 2026 халықаралық технологиялық форумының алаңында қазақстандық әлеуетті технологиялық стартаптарға арналған питч-байқау — Draper Founders Challenge финалы өтеді, – деп хабарлайды aqshamnews.kz тілшісі.
Аталмыш байқауды Astana Hub Draper University-мен бірлесіп іске қосады және ол отандық стартаптарға Силикон алқабына жол ашады.
Алдын ала іріктеу қорытындысы бойынша ең үздік 10 команда өздерінің технологиялық шешімдерін AI & Digital Bridge 2026 алаңында венчурлік және стартап-экосистема сарапшыларының алдында таныстыру мүмкіндігіне ие болады.
Қазылар алқасының құрамына Draper University-дің венчурлік экосистема жөніндегі вице-президенті Крис Джоанну (Chris Joannou), Astana Hub басқарушы директоры Танат Өскембаев және Astana Hub Ventures компаниясының бас директоры Айдана Бергазденова кіреді.
Финал қорытындысы бойынша үш жеңімпаз команда анықталады. Әр командадан бір өкіл Калифорния штатының Сан-Матео қаласындағы Draper University кампусында тұру мүмкіндігіне ие болады. Бұл қатысушыларға Силикон алқабы ортасына және халықаралық стартап-қоғамдастыққа енуге, әлемнің жетекші технологиялық экожүйелерінің бірімен танысуға және жобаларын одан әрі дамыту үшін халықаралық тәжірибе жинауға мүмкіндік береді.
Сонымен қатар Astana Hub жеңімпаздарға Hero Training 2027 акселерациялық бағдарламасына қолжетімділік береді.
Draper Founders Challenge байқауына өз өнімін немесе шешімін әзірлеп жатқан және одан әрі ауқымын кеңейтуге дайын қазақстандық технологиялық стартаптар шақырылады.
Байқаудың басым бағыттары: Physical AI, робототехника және Counter-Unmanned Aircraft Systems (C-UAS), Biotech & Life Sciences, кванттық есептеулер, ғарыш, қорғаныс, авиация және аэрокосмостық технологиялар, FinTech, MedTech, HealthTech пен SportTech, өнеркәсіптік өндіріс және биоөндіріс, сондай-ақ басқа да салалар.
Үміткерлерге қойылатын талаптарға MVP кезеңіндегі және одан жоғары жобалар — әзірленген, іске қосылған немесе пилоттық сынақтан өткізіліп жатқан өнімдері бар жобалар кіреді. Іріктеудің маңызды критерийлерінің бірі — нарықтағы расталған сұраныс: алғашқы пайдаланушылардың немесе клиенттердің болуы, пилоттық жобалар, түсім, алдын ала тапсырыстар, ниет хаттары (LOI), серіктестіктер немесе өнімнің қажеттілігін растайтын өзге де дәлелдер.
Негізін қалаушылардың жасы — 18-ден жоғары. Сондай-ақ командалар өз жобаларын ағылшын тілінде таныстыруға дайын болуы тиіс. Финалдық сөз сөйлеу форматы питчке 3 минут, ал сұрақ-жауапқа 2 минут бөледі.
AI & Digital Bridge 2026 алаңында Draper Founders Challenge финалын өткізу форумның стартап және венчурлік күн тәртібінің маңызды бөлігіне айналып, қазақстандық технологиялық кәсіпкерлерге өз әзірлемелерін халықаралық сарапшыларға таныстыруға және жаһандық стартап экожүйесіне қол жеткізуге қосымша мүмкіндік береді.
AI & Digital Bridge 2026 Қазақстандағы Цифрландыру және жасанды интеллект жылы аясында 1–3 қазан аралығында Астана қаласында өтеді.
1 қазанда мемлекет басшыларының, халықаралық делегациялар мен технологиялық индустрия көшбасшыларының қатысуымен жоғары деңгейдегі арнайы бағдарлама өтеді. Бұл күндегі іс-шараларға тек арнайы шақыру арқылы қатысуға болады.
2 және 3 қазанда AI & Digital Bridge 2026 ашық бағдарламасы өтеді. Бір алаңда жаһандық технологиялық компаниялардың өкілдері, халықаралық сарапшылар мен спикерлер, стартаптар, кәсіпкерлер мен инвесторлар бас қосады. Билет иелері осы екі күнгі форумның ашық бағдарламасына қатыса алады.
Draper Founders Challenge байқауына қатысу үшін өтінімді келесі сілтеме арқылы беруге болады: https://form.astanahub.com/form/view/246690