Қазақстанның халық әртісі Мақпал Жүнісова Ақтөбеде өткен жеке концертінде 90 жасқа толған көрерменіне 100 мың теңге сыйлап, жұрттың ықыласына бөленді, – деп хабарлайды aqshamnews.kz тілшісі.
Бұл әсерлі сәтті концертке келген көрермендердің бірі видеоға түсіріп алған. Кеш барысында тыңдармандардың бірі әншіге жақындап, 90 жасқа толған анасын арнайы концертке ертіп келгенін айтқан.
Осы сәтте Мақпал Жүнісова қарияны мерейтойымен құттықтап, оған 100 мың теңге көлемінде ақшалай сыйлық табыстаған. Әншінің бұл әрекеті залдағы жұртты да, әлеуметтік желі қолданушыларын да сүйсінтті.
Желіде көпшілік өнер иесінің кең пейілі мен жомарттығына риза болып, оған жылы лебіздерін арнады. Пікір жазғандар Мақпал Жүнісованың мұндай қасиетімен елдің ықыласына бөленіп жүргенін атап өтті.
«Жомарт десе, жомарт қой. Мақпал апай, аман болыңыз!», «Пейілі кең адам ғой», «Бұл кісі осындай жомарттығымен ерекше», «Не деген жомарттық, аман болыңыз», – деп жазды желі қолданушылары.
Айта кетейік, бұған дейін де әнші Астанадағы жеке концертінде егде жастағы жанкүйеріне қолындағы сақинасын сыйға тартып, көпшіліктің ризашылығына ие болған еді.