АЭС салуды қолдау жөніндегі Халықтық штабтың өңірлерге сапары жалғасуда. Бүгін Штаб мүшелері Солтүстік Қазақстан облысына барып, жергілікті шаруалармен, белсенді азаматтармен және ғылыми-сараптамалық қоғамдастық өкілдерімен бірнеше кездесу өткізді, деп хабарлайды aqshamnews.kz
Чапаев ауылындағы «Қызылжар сүт» ЖШС алаңында өткен кездесуде Штаб мүшелері өңірдегі ауыл шаруашылығы тауарын өндірушілермен пікір алмасты. Соңғы бес жылда СҚО-да сүт өндірісі 100 мың тоннадан астамға өсіп, бүгінде елде өндірілетін сүттің 10%-дан астамы осы өңірде өндіріледі. Сонымен қатар, «Ауыл аманаты» жобасы аясында өңір тұрғындары жалпы сомасы 79 млрд теңгені құрайтын 12,7 мың несие алып, ол қаражат мал сатып алу, шаруа қожалықтарын дамыту, жылыжайлар салу және техниканы жаңартуға бағытталды. Бұл жобалар тұрақты әрі мол электр энергиясын қажет етеді.
Мәжіліс депутаты, «AMANAT» партиясы фракциясының жетекшісі Елнұр Бейсенбаев АЭС салудың ауыл шаруашылығын дамытудағы стратегиялық маңызын атап өтті. Ол атом реакторларының тексерілген және сенімді энергия көзі ретінде алдыңғы қатарлы елдердің тәжірибесіне сүйене отырып, Қазақстанның да осы бағытта даму керектігін айтты.
«Атом реакторлары әлемнің көптеген елдерінде сенімді энергия көзі ретінде кеңінен қолданылады. Қазақстан уран қоры бойынша әлемде 2-орында, ал оны өндіруде 1-орында тұр. АЭС тұрақты энергия көзі ретінде апаттық жағдайларды болдырмауға және еліміздің энергетикалық тұрақтылығын қамтамасыз етуге мүмкіндік береді. Бұл, өз кезегінде, ауыл шаруашылығының одан әрі дамуына жол ашады», – деді ол.
Кездесуде шаруалар да АЭС құрылысына қолдау білдіріп, оның кәсіпорындардың тұрақты жұмыс істеуі үшін сенімді энергиямен қамтамасыз ететінін және агроөнеркәсіп кешенінің дамуына ықпал ететінін атап өтті.