Парламент Сенатының Төрағасы Мәулен Әшімбаев бастаған АЭС салуды қолдау жөніндегі халық штабы Абай облысында жұмысын жалғастырды, деп хабарлайды aqshamnews.kz
Штаб құрамында депутаттар, сарапшылар және белсенді азаматтар бар. Олар алдағы референдумға байланысты ақпараттық-түсіндіру жұмыстарын жүргізу аясында ауылшаруашылық өнімдерін өндірушілермен, білім беру саласының мамандарымен және коммуналдық қызметтер саласындағы еңбек ұжымдарымен кездесу өткізді. Кездесулерде экологиялық және экономикалық проблемаларды шешу тұрғысынан АЭС салудың маңызы талқыланды.
Мәулен Әшімбаев өз сөзінде қазіргі таңда әлем климаттың өзгеруі және экологияның нашарлауы сияқты түрлі сын-қатерлермен бетпе-бет келіп отырғанын атап өтті. Сонымен қатар, ол электр энергиясының тапшылығының күн санап артып келе жатқанын тілге тиек етті. Бүгінгі күні Қазақстанда өндірілетін энергияның 70 пайыздан астамы көмір электр стансаларына тәуелді. Осыған орай, энергия өндірісін арттырумен бірге, оның экологияға тигізетін зиянын азайтудың маңыздылығы айтылды. Бұл ретте атом электр станциясын салу ең тиімді шешімдердің бірі ретінде қарастырылуда.
Штаб мүшелері «Приречное агрофирмасы» ЖШС базасында облыстағы ауылшаруашылық өнімдерін өндірушілермен кездесу өткізді. Сонымен қатар, «Эйкос» ЖШС кәсіпкерлерімен және қызметкерлерімен, сондай-ақ коммуналдық сектор кәсіпорындарының ұжымдарымен де кездесулер ұйымдастырылып, аталған мәселелер кеңінен талқыланды.
«Мемлекет басшысы Қасым-Жомарт Тоқаевтың бастамасымен 6 қазанда Қазақстанда АЭС салу мәселесіне қатысты республикалық референдум өтеді. Атом электр станциясы – көмірқышқыл газының шығарындыларын және көмірге тәуелділікті азайтудың ең тиімді жолдарының бірі. АЭС-тің көмір электр станцияларынан айырмашылығы зор. Атом энергетикасы қоршаған ортаны улы газдармен, күлмен немесе зиянды қалдықтармен ластамайды. Бұл – атом энергиясының табиғатқа зиян келтірмей, еліміздің экономикасын дамытуға серпін беретін таза және тұрақты энергия көзімен қамтамасыз ету деген сөз», – деп атап өтті Мәулен Әшімбаев.