«AMANAT» партиясының Төрағасы жуырда Үкіметтің атом энергетикасы саласында кадр даярлау бойынша арнайы бағдарлама қабылдайтынын мәлімдеді. Алдағы үш жылда «Болашақ» бағдарламасы аясында әлемнің үздік жоғары оқу орындарына дәл осы салаға қатысты гранттар бөлінеді, деп хабарлайды aqshamnews.kz
Уран өнеркәсібі мамандарына тағылымдама және қайта даярлау бағдарламалары енгізіліп, бұл шаралар АЭС құрылысы аяқталған кезде 3 мыңнан астам жоғары білікті маман даярлауға мүмкіндік береді. Осыған байланысты мұғалімдердің міндеті – оқушыларды нақты ғылымдарға қызықтырып, олардың болашақ мамандықтарын таңдауға бағыт беру.
Кездесу барысында Халықтық штаб мүшелері де сөз алды. Ұлттық ғылым академиясының президенті Ақылбек Күрішбаев әлемдегі атом энергетикасын дамыту үрдістерін және қазақстандық ғылыми әзірлемелердің маңызын атап өтіп, еліміздің АЭС салуға толықтай дайын екенін айтты. Мәжіліс депутаты Мұқаш Ескендіров энергетикалық мәселелерді тез арада шешудің ел экономикасын дамыту үшін аса маңызды екенін түсіндірді. Ядролық физика институтының директоры Саябек Сахиев қазіргі заманғы үшінші буын ядролық реакторлардың қауіпсіздігі, тиімділігі және экологиялық тазалығы туралы хабардар етті.
Халықтық штаб жергілікті теміржол қызметкерлерімен де кездесті. Олар Мемлекет басшысының көлік-логистика саласын дамытуға ерекше назар аударғанын айтты. Теміржол саласына жаңа жолдар салу, пойыздар мен вагондар сатып алу, цифрландыруды енгізу сияқты кешенді реформалар қажет.
Теміржол желісін электр энергиясымен қамтудың төмендігі өткізу қабілетінің шектелуіне, жолаушылар мен жүк тасымалының баяулауына себеп болып отыр. Мәселен, Шу-Алматы учаскесінде электр энергиясы жиі үзіліп, транзиттік әлеуетімізді толық пайдалануға кедергі келтіруде. АЭС құрылысы бұл мәселелерді шешіп, отандық теміржол жүйесіне қолжетімді әрі сенімді электр энергиясын жеткізеді.