АЭС құрылысына қатысты алғашқы сызбада станция салуға қажетті қаражаттың 80%-і қарызға алынатыны, 20%-іне үкіметтің өз қаражаты жұмсалатыны көрсетілген.
Сонымен қатар сырттан инвесторларды тарту мәселесі де қарастырылып жатыр. АЭС жалпы 60 жыл жұмыс істейді. Оның алғашқы 20 жылы құрылысқа кеткен қаржыны ақтауға, ал қалған 40 жылы инвестицияны қайтаруға жұмсалады.
Алайда құрылысқа қатысты нақты шешім қабылданбағандықтан, нақты болжам жасау қиын. Дегенмен АЭС құрылысына басқа елдер де мүдделі болғандықтан, шетелдік серіктестер жобаға инвестиция құюдан тартынбайды деп ойлаймын.
Экономикалық тұрғыдан алғанда, АЭС-тен алынатын энергияның құны көмір энергиясынан қымбатырақ болуы мүмкін. Егер АЭС-та ешқандай апат болмаса, уақыт өте келе бұл қаражат өз-өзін ақтайды. Сонымен қатар Қазақстан АЭС-тың негізгі шикізаты уранды сату бойынша әлемде жетекші ел екенін ескерсек, өзімізде өндірілетін шикізатты қолдану арқылы АЭС өндіретін энергияның құнын төмендетуге болады деп болжауға болады. Бір станция сәтті салынып, жұмыс істей бастаса, елдің басқа аймақтарында да АЭС салу мүмкіндігі пайда болады. Осылайша бұл ұзақ мерзімді инвестициялық тартымды салаға айналуы мүмкін.