АЭС салуды қолдау жөніндегі Халықтық штаб Талғар ауданындағы «NUR KAGAZY» ЖШС-нің ұжымымен кездесу өткізді. Жиын барысында атом энергетикасының Қазақстан экономикасы мен энергетикалық қауіпсіздігіне ықпалы талқыланды, деп хабарлайды aqshamnews.kz
Халықтық штабтың мүшесі Ләззат Тұрлашов өз сөзінде АЭС-тің еліміз үшін маңызды стратегиялық жоба екенін атап өтті. Ол атом энергетикасының елді энергетикалық тәуелсіздікке жеткізетін басты қадам екеніне баса назар аударды.
«Біз қазір жаңа энергетикалық кезеңнің алдында тұрмыз. АЭС – тек сенімді электр көзі ғана емес, еліміздің экономикалық дамуының негізгі қозғаушы күшіне айналады. Қазіргі таңда еліміздегі электр энергиясының 70%-ын көмір станцияларынан алып отырмыз, бірақ бұл тәсілдің экологиялық тұрғыдан тиімсіз екені белгілі. АЭС салу – осы мәселелерді шешудің оңтайлы жолы», – деді Тұрлашов.
Өндіріс қызметкері Сәбит Тастеміров те өз пікірін білдіріп, электр қуатының жетіспеушілігі өндіріс орындарына кері әсерін тигізетінін айтты. Ол АЭС салу арқылы елімізде тұрақты энергиямен қамтамасыз етіліп, артық қуатты экспорттауға мүмкіндік туатынын атап өтті.
Кездесуге қатысушылар АЭС жобасының экономикалық және экологиялық тиімділігін талқылап, ел болашағы үшін бұл жобаны қолдауға дайын екендерін жеткізді.