Британиялық сарапшылардың пайымдауынша, алдағы 50-100 жыл ішінде әлем толықтай таза энергияға көшеді.
Осыған байланысты ядролық энергетикаға көшу өте маңызды.
Саймон Маршалл — Дүниежүзілік энергетикалық конгрестің өкілі. Штаб-пәтері Лондонда орналасқан бұл ұйыммен әлемнің 100-ге жуық мемлекеті жұмыс істейді. Конгрестің басты мақсаты — энергетика саласының бүгіні мен болашағын талқылау үшін әлем сарапшыларын біріктіру, деп хабарлайды aqshamnews.kz.
«Қазэнерджи» Қазақстан мұнай-газ және энергетика кешені ұйымдарының қауымдастығы да конгреспен тығыз жұмыс істейді.
Маршаллдың пікірінше, атом электр станциясын салудың көптеген артықшылықтары бар:
«АЭС құрылысы кезінде және пайдалануға берілгеннен кейін жұмыс орындары пайда болады. Таза және сенімді энергия көзі энергетикалық тәуелсіздікке қол жеткізуге көмектеседі. Бұл сырттан әкелінетін энергия көздеріне қажеттілікті азайтады. Ең маңыздысы — АЭС экологиялық таза энергия береді», — дейді Дүниежүзілік энергетикалық конгрестің өкілі Саймон Маршалл.