Respublica партиясының Мәжіліс депутаты Нұргүл Тау «Алатау жарық компаниясы» АҚ ұжымымен және алматылық жастармен кездесу өткізді.
Кездесу барысында депутат атом электр станциясының не екенін және оның елге тигізетін пайдасын қарапайым тілмен түсіндірді. Атом электр станциясы — атом энергиясын пайдаланып электр энергиясын өндіретін өнеркәсіп. АЭС атомдардың бөлінуі кезінде жылу бөлетін процесс негізінде жұмыс істейді. Бұл жылу суды ысыту үшін пайдаланылады, ал ыстық су буға айналады. Бу турбиналарды айналдырады, ал турбиналар электр энергиясын өндіреді.
Нұргүл Тау атом энергетикасын дамыту арқылы еліміздің импорттық энергетикалық ресурстарға тәуелділігін азайтуға, экологиялық қауіпсіздікті нығайтуға және парниктік газдардың бөлінуін қысқартуға қол жеткізуге болатынын атап өтті.
Қазақстанда атом электр станциясын салу мәселесі бойынша республикалық референдум 2024 жылдың 6 қазанында өтеді. Әрбір қазақстандық осы референдумға қатысу арқылы өз пікірін білдіре алады.