«ЮНЕСКО» жанындағы Халықаралық мәдениеттерді жақындастыру орталығы және М.О. Әуезов атындағы Әдебиет және өнер институтының ұйымдастыруымен, «ТҮРКСОЙ» Жазушылар одағының қолдауымен «ОҚУҒА ҚҰШТАР ҰЛТТЫҢ ҚАЙТА ЖАҢҒЫРУЫ» атты VI Халықаралық конференция өтті.
Шараның басты мақсаты – ұлттық әдебиеттердің диалог арқылы даму факторлары мен әлемдік мәдениеттердің жақындасуын және осы үдерістердің ХХІ ғасырдағы кітап оқитын ұлттың жаңғыруына ықпалын зерттеу.
Халықаралық конференцияға идея авторы, белгілі жазушы, қоғам қайраткері Олжас Омарұлы Сүлейменов арнайы қатысып, қазіргі қоғамдағы өзекті мәселелер, тарихымыздағы түрлі кезеңдер турасында сөз сөйледі.
Шараның пленарлық отырысын - М.О.Әуезов атындағы Әдебиет және өнер институты Халықаралық қатынастар және әлем әдебиеті бөлімінің меңгерушісі, филология ғылымдарының кандидаты Светлана Викторовна АНАНЬЕВА, «Оқитын ұлттың жаңғыру факторлары» атты секция мәжілісін М.О. Әуезов атындағы Әдебиет және өнер институтының Бас директоры, ҚР ҰҒА академигі, филология ғылымдарының докторы Кенжехан Ісләмжанұлы МАТЫЖАНОВ, «Әдебиеттің қоғамдағы орны мен болашағы» атты бөлімін «ТҮРКСОЙ» Жазушылар одағының төрағасы Ұлықбек ЕСДӘУЛЕТ жүргізді.
Конференцияда ҚР Мәдениет және ақпарат министрінің, Қазақстанның ЮНЕСКО жанындағы тұрақты өкілдігінің, Түркі академиясының, Ресей Жазушылар және Баспагерлер одақтарының қауымдастығының, Ресей кинематографистер одағының, Беларусь Ұлттық кітапханасы, Өзбекстан Ұлттық кітапханасының құттықтау хаттары оқылды. Сонымен қатар Қазақстанның Халық жазушысы Мұхтар Мағауиннен келген арнайы хат табысталды.
III бөлімнің тұрған алқалы жиынға Түркия, Ресей, Азербайжан, Өзбекстан, Қырғызстан елдерінің мемлекет және қоғам қайраткерлері, жазушылары мен ғалымдары арнайы келіп, төмендегі тақырыптар аясында баяндама жасады:
- Тарихты терең түсінудегі тарихи және көркем әдеби шығармалардың алатын орны;
- Ғылым, білім және оқу мәдениеті: болашақ ұрпақ мәселесі;
- Мәдениеттер арасындағы байланыс: оқырман ұлттың қайта жаңғыруы және т.б. өзекті мәселелер қозғалды.
Конференция барысында М.О. Әуезов атындағы Әдебиет және өнер институтының Бас директоры, ҚР ҰҒА академигі, филология ғылымдарының докторы Кенжехан Ісләмжанұлы Матыжанов, Әзербайжанның Халық жазушысы, Мемлекет қайраткері, филология ғылымдарының докторы Эльмира Ахундова, «ТҮРКСОЙ» Жазушылар Одағының төрағасы, ҚР Мемлекеттік сыйлығының иегері Ұлықбек Есдәулет «Олжас Сүлейменов атындағы «Халықтар Достығы» орденімен марапатталды.
