2025 жылдың 28 ақпан күні Алматы қаласы Алатау ауданындағы Оқушылардың инновациялық шығармашылық орталығында ұлы ақын Абай Құнанбаевтың 180 жылдығына орай маңызды іс-шара өткізілді. Қазақстан Республикасы Оқу-ағарту министрлігінің қолдауымен, Республикалық ғылыми-педагогикалық кітапхана мен «Оқуға құштар мектеп» жобасының аясында ұйымдастырылған бұл іс-шара «Менің сүйікті кітабым – Абай шығармалары» тақырыбында республикалық челлендж болып өтті, деп хабарлайды aqshamnews.kz
Бұл челлендждің басты мақсаты – Қазақстанның барлық мектеп оқушыларын Абай Құнанбаевтың шығармаларын оқуға ынталандыру, оқу белсенділіктерін арттыру, сондай-ақ кітап оқуға деген қызығушылықты ояту және тәрбиелеу болып табылады. Шараның аясында оқушылар ақынның шығармашылығымен танысып, өздері оқыған ең сүйікті шығармаларын ортаға салды.
Челлендждің негізгі міндеттері:
- Оқушылардың оқуға деген құштарлығын арттыру;
- Оқушыларды Абай Құнанбаевтың шығармаларын оқуға тарту;
- Кітап оқу мәдениетін қалыптастыру;
- Жас ұрпақты Абай Құнанбаевтың шығармалары арқылы рухани байыту.
Іс-шараны ұйымдастыруға Қазақстан Республикасының Оқу-ағарту министрлігі, Республикалық ғылыми-педагогикалық кітапхана, Алматы қаласының Білім басқармасы, Қалалық білім берудегі жаңа технологиялардың ғылыми-әдістемелік орталығы, сондай-ақ Алматы қаласы Алатау ауданы Оқушылардың инновациялық шығармашылық орталығы атсалысты. Челленджге еліміздің барлық аймақтарынан 17 облыс пен 3 республикалық маңызы бар қалалардан оқушылар қатысты. Олар ZOOM платформасы арқылы бір нүктеден қосылып, Абай Құнанбаевтың шығармаларын оқып, өз пікірлерін білдірді.
Челлендж 28 ақпан күні сағат 11:00-де ZOOM платформасы арқылы өткізілді. Әр аймақ Абай Құнанбаевтың белгілі шығармаларын ұсынды. Оқушылар ақынның терең ойлары мен көркем туындыларын талқылап, өздерін әдебиетке деген қызығушылықтарын арттырды. Шара барысында Абайдың шығармалары ғана емес, жалпы әдебиет пен кітап оқу мәдениеті де насихатталды.
Челлендждің нәтижесінде оқушылардың кітап оқуға деген ынтасы артты, Абай Құнанбаевтың шығармалары арқылы олардың рухани әлемі кеңейе түсті. Сонымен қатар, бұл шара оқушылардың кітап оқу мәдениетін қалыптастыруға, олардың әдебиетке деген сүйіспеншілігін нығайтуға ықпал етті.
Бұл челлендж Абай Құнанбаевтың мұрасын ұлықтап, балалардың әдебиетке деген қызығушылығын арттыруға зор үлес қосты. Оқушылар арасында кітап оқуға деген құштарлық пен ұлттық әдебиетке деген құрмет қалыптасып, болашақта кітап оқу мәдениетін дамытуға ықпал ететіндігі сөзсіз.