Абай атындағы Қазақ ұлттық опера және балет театры үшін, биыл мерейлі жыл – қара шаңырақ өзінің 90-шы маусымын жарық көргеніне 80 жыл толған Ахмет Жұбанов-Латиф Хамидидің «Абай» опералық спектаклімен атап өтеді.
Өнер ордасы айтулы мерекені 28 қыркүйекте сағат 15:00-де жүзден астам ардагерін марапаттаудан бастайды. Ардақты азаматтарын қызыл кілем төсеп қарсы алатын ұжым, мерейлі жылдар бойы өмірін асқақ сахнаға, шығармашылыққа, театрға қызмет етуге арнаған адал жандарға арнайы төсбелгі және сыйлық табыстайды.
Мерекелі шараға асылдың тұяқтары Қазақ КСР Халық әртісі Раушан Хатиятқызы Байсейітова және Қазақ КСР Халық әртісі Бақыт Әшімованың ұрпағы қатысып, қадірлі қонақтарымыз Абай атындағы театр мұражайына тарихи құнды мұра табыс етеді деп күтілуде.
Марапат барысында ардагерлерімізге шағын музыкалық тарту ұйымдастырылады. Салтанатты күн ақсақалдарымыздың Ахмет Жұбанов пен Латиф Хамидидің «Абай» операсын тамашалаумен тәмамдалады.
Абай атындағы Қазақ ұлттық опера және балет театры осылайша өзінің «Ғасыр алдындағы жаңа белесіне» – 91-ші маусымына қуанышпен аяқ басады.