Қазақстан Премьер-министрінің орынбасары – ұлттық экономика министрі Серік Жұманғарин 2024 жылға қатысты қосымша табысы туралы көпшілікке ашық есеп берді, - деп хабарлайды aqshamnews.kz тілшісі.
Мәліметтер министрліктің сайтында жарияланған. Есепке сәйкес, Жұманғарин салық декларациясында 88 678 984 теңге көлеміндегі соманы көрсеткен. Құжатта министрдің жұбайы да аталған, алайда нақты сома көрсетілмеген.
Бұл қандай ақша?
Есепте тек қосымша табыс көрсетілген - яғни министрдің жеке тұлға ретінде салықты өзі төлейтін кірістері. Басқаша айтқанда, бұл жерде ресми жалақы ескерілмейді.
Жұманғаринге қатысты есепте табыс бағалы қағаздар нарығына инвестиция салудан түскені жазылған. Демек, сөз дивидендтер мен сыйақылар туралы болып отыр (министр оларды декларацияда көрсеткен).
Мемқызметкерлерге арналған есептілік жеңілдетілді
Бұған дейін Мемлекеттік қызмет істері агенттігі жариялануға міндетті кіріс пен мүлік туралы мәліметтердің жаңа тізімін бекіткен. Онда тек үш баған қалдырылған:
-
декларация тапсырушының және оның жұбайының тегі, аты, әкесінің аты;
-
есеп берілетін салық кезеңі;
-
салық салынатын кірістің жалпы сомасы.
Бұрын мемлекеттік қызметшілер шоттардағы қаражатты (оның ішінде шетелдік банктердегі), сондай-ақ мүлікті сатудан түскен пайда мен өзге кірістерді де көрсетуге міндетті болған.