Жетісу облысының прокуратурасы жеке сот орындаушыларының табысын жасыру деректерін анықтады, - деп хабарлайды aqshamnews.kz тілшісі Талдықорған прокуратурасына сілтеме жасап.
Тексеру барысында бірқатар жеке сот орындаушыларының (ЖСО) 2023 жылға арналған 240.00 нысанды жеке табыс салығы декларациясында нақты тапқан кірістерін едәуір төмендетіп көрсеткені белгілі болды.
Прокуратура бұл "көлеңкелі" тәжірибе салық заңнамасын ғана емес, адал салық төлеушілерге қатысты әділдік қағидаттарын да бұзатынын атап өтті.
Ресми статистикаға сәйкес, аяқталған атқарушылық өндірістердің нақты көлемі 896,1 млн теңге болған. Алайда салық декларацияларында бар болғаны 231 млн теңге ғана көрсетілген. Яғни жасырылған айырмашылық 665,1 млн теңгеге жеткен.
Қала прокуратурасының ұсынуы нәтижесінде үш жеке сот орындаушысы қосымша салық декларацияларын тапсырып, соның негізінде 2,6 млн теңге көлемінде қосымша салық төлеген.
Осындай ұқсас бұзушылықтар барлығы 17 жеке сот орындаушыдан анықталды. Қазір прокурорлық қадағалау актісін орындау мақсатында уәкілетті орган ЖСО-лардың салық берешегін өндіру бойынша шаралар қабылдап жатыр.