Бүгін – Дүниежүзілік бронх демікпесі күні
11 желтоқсанда Дүниежүзілік демікпемен күресу күні атап өтіледі. Бұл күннің басты міндеті – ауру және оны бақылау әдістері туралы хабардар болу, демікпенің белгілері туралы білуді насихаттау, емдеудің жаңа тәсілдерін айту, пациенттерді дәрі-дәрмектер мен ингаляторларды дұрыс қолдануға үйрету, аурудың алдын алудың маңыздылығына, триггерлермен күресуге және ауа сапасын жақсартуға баса назар аудару.
Бронх демікпесі – тыныс алу жолдарының созылмалы қабыну ауруы. Ол әртүрлі тітіркендіргіштерге жоғары сезімталдығымен сипатталады. Негізгі белгілері: ентігу, жөтел (көбінесе түнгі), кеуде қуысының қысылу сезімі, сырылдар немесе ысқырықтар.
Демікпенің себептері әртүрлі, олар:
- генетикалық бейімділік;
- аллергиялық реакциялар;
- ластанған ауа мен токсиндердің әсері;
- вирустық инфекциялар;
- стресс және физикалық белсенділік.
«Демікпе балалық шақта да, ересек жаста да болуы мүмкін. Бұл экологиясы нашар немесе аллергендердің әсеріне ұшыраған адамдарда жиі кездеседі. Демікпені емдеу тыныс алу жолдарының қабынуын азайтуға және өршудің алдын алуға бағытталған. Негізгі тәсілдері: ингаляциялық глюкокортикостероидтарды қолдану; симптомдарды тез жеңілдету үшін бронхолитиктерді қолдану; аллергендер мен триггерлерден аулақ болу; пикфлоуметрлердің көмегімен жағдайды үнемі бақылауда ұстау. Бұл жағдайда салауатты өмір салты маңызды рөл атқарады: дұрыс тамақтану, физикалық белсенділік керек және темекі шегуден бас тартқан дұрыс», – дейді Кардиология және ішкі аурулар ҒЗИ республикалық аллергология орталығының басшысы Арай Батырбаева.
Дүниежүзілік денсаулық сақтау ұйымының мәліметтері бойынша, әлемде 262 миллионнан астам адам демікпемен өмір сүреді және жыл сайын бұл аурудан 455 мыңға жуық адам көз жұмады. Бұл статистика аймаққа, экономикалық даму деңгейіне және қоршаған орта жағдайына байланысты өзгеріп отырады.
Дүниежүзілік демікпемен күрес күні бұл ауруды, дұрыс қараған жағдайда бақылауда ұстауға болатындығы туралы еске салады. Демікпе толыққанды өмір сүруге кедергі болмауы керек және бұған мемлекеттердің, медициналық ұйымдардың және пациенттердің күш-жігерін біріктіру арқылы қол жеткізуге болады.