Қоғамдық тәртіп бұзылған жоқ, құқық бұзушылықтар тіркелмеді, деп хабарлайды aqshamnews.kz тілшісі.
Қарағандыда Кеншілер күніне орай ұйымдастырылған ауқымды концерттік бағдарлама өтті. Әлемге танымал өнер жұлдыздары қатысқан мерекелік шараға облыс аумағынан, көршілес қалалардан, сондай-ақ алыс-жақын шетелдерден келген тұрғындар мен қонақтар жиналуда.
Қарағанды облысы әкімінің орынбасары Әлібек Әлденейдің айтуынша, шараға 250 мың адам қатысқан.
"Бір алаңға 250 мың көрермен жиналды! Мұндай ауқымды концерт Қазақстанда бұрын-соңды болған емес! Ұлыбритания, Италия, Испания, Моңғолия және ТМД елдерінен арнайы қонақтар келді. Олардың арасында қаламызға алғаш рет табан тіреп, Қарағандыны жаңа қырынан танығандар да аз емес. Осындай үлкен шараны өткізу үшін қалада 5 гектардан астам жер бөлініп, арнайы алаң жабдықталды. 250 мың адамның қауіпсіздігін қамтамасыз ету – үлкен жауапкершілік. Осыншама халық қатысқан мерекенің ұйымшылдықпен өтуі – көптеген мекемелердің бірлескен еңбегінің нәтижесі", – деп жазды әкімнің орынбасары.
Қоғамдық тәртіп пен қауіпсіздікті қамтамасыз ету, құқық бұзушылықтардың алдын алу мақсатында Қарағанды облысы Полиция департаментінің қызметкерлері, Ұлттық ұланның әскери қызметшілері, сондай-ақ төтенше жағдайлар және денсаулық сақтау саласының мамандары күшейтілген режимде қызмет атқаруда.
Қазіргі уақытта барлық мемлекеттік органдар штаттық режимде жұмыс істеп жатыр.
Қоғамдық тәртіп бұзылған жоқ, құқық бұзушылықтар тіркелмеді.
Қауіпсіздік шаралары концерттік бағдарлама толық аяқталғанға дейін жалғасады.
