Ақмола облысында полиция қызметкері Серғазы Мейірманов ширек ғасырдан бері тұрақты түрде донор болып, осы уақыт ішінде 20 литрге жуық қан тапсырып, 80-ге жуық адамның өмірін сақтауға үлес қосты, деп хабарлайды Aqshamnews.kz тілшісі.
Көкшетау қалалық полиция басқармасының жедел-криминалистикалық бөлімінде аға криминалист болып қызмет ететін Серғазы Мейірманов донорлық жолын 2000 жылы, студент кезінде бастаған. Курстасының туысына шұғыл қан қажет болғанда, ол алғашқылардың бірі болып көмектесуге асығыпты.
«Сол кезде ешқандай ерлік жасамай-ақ, жай ғана қол ұшын созу арқылы біреудің өмірін сақтап қалуға болатынын түсіндім», – дейді ол.
Оқу бітіріп, ішкі істер органдарына қызметке тұрғаннан кейін де тәртіп сақшысы бұл игі әдетінен жаңылған жоқ. Ол «5 қайырымды іс», Жол апаты құрбандарын еске алу күні, Криминалистер күні сияқты кәсіби мерекелер аясында өтетін донорлық акцияларға тұрақты түрде қатысып келеді.
Облыстық қан орталығының мәліметінше, Серғазы Мейірманов 40-тан астам рет донация жасап, шамамен 20 литр биоматериал тапсырған. Бұл көмек 80-ге жуық адамның өмірін сақтауға сеп болған.
Ізгі ісі үшін оған облыстық қан орталығы мен ІІМ басшылығы атынан Алғыс хат табысталды. Қазір ол әріптестері мен жас мамандар арасында донорлық мәдениетті насихаттап, қайырымдылыққа үндеп жүр.