Мәжіліс депутаттарының сауалына берген жауабында Премьер-министрдің орынбасары Серік Жұманғарин елімізде салауатты өмір салтын насихаттау бағытында бірқатар маңызды шаралар қолға алынғанын аңғартты, - деп хабарлайды Aqshamnews.kz.
"Кейінгі жылдары денсаулық сақтау министрлігі дұрыс тамақтану, жастар денсаулық орталықтарын дамыту, темекі мен алкоголь тұтынуды азайту, дене белсенділігін арттыру және салауатты өмір салтын ақпараттық насихаттау бойынша кешенді жол карталарын іске асырып жатыр, - деді вице-премьер.
Сонымен қатар, ол бірқатар заңнамалық бастамаларды атап өтті:
- 21 жасқа дейінгі азаматтарға энергетикалық сусындарды сатуға тыйым салу;
- Вейп өнімдерін әкелуге және сатуға шектеу қою;
- Темекі мен алкоголь тұтынуды азайту шараларын бекіту;
- Энергетикалық сусындарға алғаш рет акциз енгізу;
- Мектеп тағамы стандарттарын жаңарту.
Серік Жұманғариннің мәліметінше, 21 жасқа толмағандарға энергетикалық сусындарды сататындарға әкімшілік жауапкершілік енгізу жұмыстары жүріп жатыр.
Айта кетейік, 2025 жылдың қаңтарынан бастап "Халық денсаулығы және денсаулық сақтау жүйесі туралы»" Кодекске енгізілген түзетулер күшіне енді, оған сәйкес 21 жасқа толмаған азаматтарға энергетикалық сусындарды сату қатаң тыйым салынған.