24 қаңтарда Алматы қаласы Қоғамдық денсаулық сақтау басқармасының басшысы Марат Пашимов №2 Балалар қалалық клиникалық ауруханасына жұмыс сапары барысында 2025 жылғы медициналық қызмет көрсетудің есебін тыңдап, одан әрі дамудың негізгі басым бағыттарын белгіледі.
Есепте клиникалық, қаржылық және ұйымдастырушылық көрсеткіштер толық ұсынылды. Марат Пашимов медициналық-санитарлық алғашқы көмек пен балалар стационарларының өзара іс-қимылын күшейту, жас мамандардың кәсіби біліктілігін арттыру, пациенттердің қанағаттанушылығын жоғарылату және шағымды азайту жұмыстарын жүйелендіру қажеттігін атап өтті. Сондай-ақ, балаларға сапалы және қолжетімді стационарлық көмек көрсетудің маңызына тоқталды.
№2 Балалар қалалық клиникалық ауруханасы жоспарлы, шұғыл, оңалту және консультациялық-диагностикалық көмек көрсететін жетекші медициналық ұйым саналады. 2025 жылы стационарлық көмек көлемі 4,3%-ға, жоспарлы емдеуге жатқызу 2,3%-ға артты. Бір жыл ішінде 3 500-ден астам ота жасалып, 20-дан астам инновациялық емдеу әдісі енгізілді, олардың бір бөлігі Қазақстанда тек осы ауруханада қолданылады. Жабдықтармен қамтылу көрсеткіші – 98,08%, кадрлық қамтамасыз ету – 99%.
2026 жылы аурухананың басты басымдықтары ретінде хирургиялық белсенділікті арттыру, салалық кафедралармен өзара іс-қимылды дамыту, жаңа корпус құрылысының мониторингін жүргізу, 15 орындық паллиативтік бөлімше ашу, алты құзыреттілік орталығын құру және ЭЭГ-ті автоматты түрде түсіндіру үшін ZiyatronAI жүйесін енгізу көзделген.
Кездесу қорытындысы бойынша Марат Пашимов құзыреттілік орталықтарын дамыту, паллиативтік көмекті оңтайландыру, халықаралық ғылыми-тәжірибелік ынтымақтастықты кеңейту, медициналық туризмді дамыту, инновацияларды енгізу және клиниканың инфрақұрылымын жаңғыртуды жалғастыруды тапсырды.