Жалпыға бірдей декларациялау: Қаржы министрлігі мерзімдер туралы еске салды
15 қыркүйекте заңды тұлғалардың басшылары, құрылтайшылары, жеке кәсіпкерлер және олардың жұбайлары үшін декларация тапсыру мерзімі аяқталады, деп хабарлайды aqshamnews.kz
Мемлекеттік кірістер комитетінің мәліметінше, жыл басынан бері декларацияны жалпы декларанттардың 60%-ы, яғни 1,4 миллион адам тапсырған. Жалпы, 2024 жылы 2,4 миллион жеке тұлға декларация тапсыруға міндетті.
«Декларация активтер мен міндеттемелер туралы ақпаратты ел ішінде және оның шегінен тыс жерде 31 желтоқсанға дейінгі жағдай бойынша көрсетуге арналған. Сонымен қатар, декларацияны ұсынудан резидент еместер, коммерциялық емес ұйымдардың құрылтайшылары (қатысушылары) және акционерлер босатылады», — делінген хабарламада.
Еске сала кетейік, осы жылдың 1 қаңтарынан бастап жалпыға бірдей декларациялаудың үшінші кезеңі басталды, ол кәсіпкерлер мен олардың жұбайларын қамтыды. Бұған дейін құжатты тек мемлекеттік қызметшілер мен олардың отбасы мүшелері ғана ұсынатын.
«Салық міндеттемесін уақтылы орындамаудан аулақ болу үшін барлық азаматтардан декларацияны тұрғылықты жері (тіркелген мекенжайы) бойынша алдын ала тапсыруды сұраймыз», — деп ескертті Қаржы министрлігі.