Бірінші сыныпқа өтініштерді қабылдау 2022 жылғы 1 тамызға дейін жалғасады.
Білім және ғылым министрлігінің мәліметінше, 1-сыныпқа қабылдауға түскен 250 мыңнан астам өтініштің ішінде балалардың 70,5 %-ы мемлекеттік тілде оқуды таңдаған, деп хабарлайды Almaty-akshamy.kz
Азаматтарға ыңғайлы болу үшін қызмет автоматтандырылды. Құжаттарды қабылдау egov.kz порталы арқылы жүргізіліп жатыр. Сондай-ақ ата-аналардың өтініші бойынша құжаттарды дәстүрлі қағаз форматында да тапсыруға болады.
«Құжаттарды қабылдау штаттық режимде жүріп жатыр. Осы ретте құжаттарды тапсыруда ата-аналардың белсенділігін байқауға болады. Биыл мемлекеттік тілде білім алғысы келетін 1-сынып балалары көбейді. Қазақ тілінде оқитын сыныптарға қабылдаудың ең жоғары көрсеткіші Маңғыстау (91%), Қызылорда (91,5%), Жамбыл (82,2%) және Атырау (80,1%) облыстарында тіркелді», - деді Мектепке дейінгі және орта білім комитетінің төрағасы Гүлмира Кәрімова.
Жаңа оқу жылында 1-сыныпқа барлығы 400 мыңнан астам бала бармақ.