Қазақстанда әуе компанияларының өз рейстерінің жағдайын өзгертуі немесе оларды орындамауы салдарынан жолаушыларға келтірілген ыңғайсыздықтар үшін жауапкершілігі күшейтіледі. «Ашық НҚА» порталында жарияланған заң жобасында әуе компанияларының жолаушыларға көрсетілетін қызметтерді тиісті деңгейде орындамауы, рейстің кешігуі, жоюы немесе маршрутының өзгеруі сияқты жағдайлар үшін айтарлықтай айыппұлдар қарастырылған, деп хабарлайды aqshamnews.kz
Қазақстан Республикасының әуе кеңістігін пайдалану туралы заңы және ҚР Әкімшілік құқық бұзушылық туралы кодексінің 567-бабы бойынша әуе компаниялары рейстердің кешігуі немесе жоюы үшін жолаушыларға өтемақы төлеуге міндетті. Бірақ бұл талаптар рейс маршрутының немесе ұшу уақыттарының өзгеруіне қатысты жағдайларда қолданыла бермейді. Құқықтық олқылықтар салдарынан, әуе компаниялары көбіне бұл өзгерістер үшін жауапкершіліктен жалтарады. Ал мұндай жағдайлар жиі кездесіп, 2023 жылы рейстердің 16 мыңнан астам кешігуі тіркелген және жолаушылардың шағымдары өткен жылмен салыстырғанда екі есе көбейген.
Құжаттың жаңа редакциясында әуе компанияларының жауапкершілігін арттыру мақсатында, рейс өзгерістері немесе басқа да кемшіліктер үшін айыппұл мөлшері айтарлықтай өседі. Жаңа түзетулерге сәйкес:
- Бірінші рет бұзушылық үшін айыппұл мөлшері 400 айлық есептік көрсеткішке (АЕК) дейін,
- Бір жыл ішінде қайталанған жағдайда 2000 АЕК-ке дейін айыппұл салынуы мүмкін.
Бұл шаралар әуе компанияларын өз міндеттемелерін орындауға, яғни жолаушыларға жақсы қызмет көрсетуге ынталандыруды мақсат етеді.
Әлемнің көптеген елдерінде жолаушылардың ыңғайсыздықтары үшін өтемақы төлеу міндеті заңды түрде қарастырылған. Мысалы, АҚШ-та жолаушылардың құқықтарын бұзғаны үшін айыппұлдар 50 мың АҚШ долларына дейін жетуі мүмкін, ал Сауд Арабиясында бұл сома 50 мың риалға дейін жетеді.
Жаңа заң жобасында әуе компанияларының нормаларды сақтауын бақылау жолаушылардың шағымдары мен инспекциялық тексерулер арқылы жүзеге асырылады. Егер әуе компаниясы өз міндеттемелерін орындаудан бас тартса, мәселе сотқа дейін жеткізілуі мүмкін. Бұл заң жобасы қосымша тексерулер жүргізуді қарастырмаса да, айыппұлдарды көбейту арқылы авиакомпаниялардың жауапкершілігін арттыруды көздейді.