Алматыда 3,6 мыңнан астам спорт нысаны жұмыс істейді. Бұл туралы қалалық Спорт басқармасының өкілдері айтты.
2024–2025 жылдары алты жаңа дене шынықтыру-сауықтыру кешені пайдалануға берілді, сондай-ақ жеке инвестиция есебінен екі спорт кешені бой көтерді. Алатау ауданындағы Нұркент шағынауданында инвесторлар аяқтаған жаңа теннис орталығы ашылды. «Тұлпар» кешені ұлттық спорт түрлерін дамыту үшін коммуналдық меншікке қайтарылды, Райымбек даңғылында ерекше қажеттілігі бар адамдарға арналған спорт орталығының құрылысы басталды.
2027 жылдың соңына дейін Наурызбай, Алатау және Түрксіб аудандарында жалпы ауданы 71 мың шаршы метр болатын алты дене шынықтыру-сауықтыру кешені салу жоспарланып отыр. Сондай-ақ үш спорт мектебін жаңғырту көзделген: №9 спорт мектебі үшін сейсмикалық күшейтумен бірге күрделі жөндеуге құжаттама әзірленіп жатыр; спортта дарынды балаларға арналған мектеп-интернат сараптаманың оң қорытындысын алды; №2 спорт мектебі үшін күрделі жөндеу жобасы жасалып жатыр.
Бірегей жобалардың қатарында FIFA және UEFA стандарттарына сәйкес 15 гектар аумақта 40 мың орындық жаңа футбол стадионының құрылысы, сондай-ақ 2 гектар аумақта төбесінің биіктігі 17 метр болатын көркем гимнастика орталығын салу бар. Бұл халықаралық жарыс өткізуге мүмкіндік береді. Орталық стадионда сәулеттік келбеті мен жеңіл атлетика жолақтарын сақтай отырып, жаңарту жүргізу жоспарланған. Сонымен қатар «Медеу» биік таулы спорт кешенін жаңғырту басталды. Жаңғырту аясында кешеннің тарихи келбеті сақтала отырып, толық жаңарту жүргізіледі. Инженерлік желілер жаңартылып, заманауи инфрақұрылым жасалып, спортшылар мен қонақтарға арналған жағдай жақсартылады.
Бұған қоса, жыл соңына дейін Алматыда 20-дан астам мұз айдынын ашу жоспарланған, деп атап өтті қалалық Спорт басқармасының өкілдері.