32 жастағы бразилиялық шабуылшы Элдер Сантана "Қайрат" командасынан кетті, деп хабарлайды aqshamnews.kz клубтың баспасөз қызметіне сілтеме жасап.
32 жастағы шабуылшы келісімшарт мерзімінің аяқталуына байланысты алматылық клубта өнер көрсетуін аяқтаған.
"Қайрат" ФК Элдерге клуб жетістіктеріне қосқан үлесі үшін алғыс айтып, алдағы мансабында сәттілік пен жаңа табыс тілейді!"- делінген хабарламада.
Элдер Сантана сары-қаралардың қатарына 2024 жылғы маусымда қосылып, осы уақыт ішінде Қазақстанның екі дүркін чемпионы болды.
Сондай-ақ 2025 жылғы Қазақстан Суперкубогы үшін өткен "Ақтөбеге" қарсы жеңісті матчта ол бір гол соғып, бір нәтижелі пас беріп, кездесудің үздік ойыншысы атанды. Алайда келесі ойында шабуылшы ауыр жарақат алып, маусымның соңына дейін қатардан шығып қалған.
Жалпы "Қайрат" сапында Сантана 31 матч өткізіп, 5 гол соғып, 3 нәтижелі пас берген.