Алматы облысындағы тасжолда адам өлімімен аяқталған жол-көлік оқиғасы болды, - деп хабарлайды Аqshamnews.kz тілшісі.
Алматы облыстық полиция департаментінің баспасөз қызметінің дерегінше, апат «Алматы – Өскемен» автожолының 94-шақырымында болған.
«Алдын ала мәлімет бойынша, Changan маркалы автокөлік жүргізушісі рөлге ие бола алмай, бір бағытта келе жатқан жүк көлігінің тіркемесіне соқтығысқан. Соққыдан кейін жеңіл көлік инерциямен жол жиегіндегі қоршауға соғылған. Артынша Toyota Estima көлігі Changan-мен соқтығысып, кейін инерциямен жол жиегінде тұрған тіркемеге барып соғылған", - делінген хабарламада.
Сонымен қатар соққының қатты болғаны соншалық, Changan автокөлігінің қозғалтқышы қарсы бағытқа ұшып барып, ол жақта келе жатқан Ford Focus көлігімен жанасқан.
Жол апаты салдарынан Changan көлігіндегі екі жолаушы оқиға орнында көз жұмды. Аталған автокөліктің жүргізушісі және Toyota Estima жүргізушісі түрлі жарақаттармен ауруханаға жеткізілді.
Полиция қызметкерлері қылмыстық іс қозғап, болған оқиғаның барлық мән-жайын анықтау үшін жан-жақты тергеу жүргізіп жатыр.