Túrkistan oblysy Ordabasy aýdanyna qarasty Tórtkúl aýylynda jol jıeginen máıiti tabylǵan 16 jastaǵy qyzdyń ólimine qatysty is aýdanaralyq qylmystyq ister jónindegi sotta jabyq túrde qaralatyn boldy, - dep habarlaıdy Aqshamnews.kz tilshisi Otyrar.kz-ke silteme jasap.
Tergeý isi Qylmystyq kodekstegi «Adam óltirý», «Zorlaý» jáne «Seksýaldyq sıpattaǵy zorlyq-zombylyq áreketteri» baptarymen júrgizilip jatyr.
Qaıǵyly oqıǵa bıyl 6 maýsymǵa qaraǵan túni bolǵan. Aýyl turǵyndarynyń aıtýynsha, jasóspirim ádettegideı otbasynyń dúkeninen úıine qaraı shyqqan, alaıda sol kúıi oralmaǵan. Týystary men aýyl turǵyndary polısıamen birge ony túni boıy izdegenimen, taba almaǵan.
Kelesi kúni tańerteń polıseıler qyzdyń máıitin jol boıyndaǵy balabaqsha mańynan tapqan.
Basylymnyń málimetinshe, sol kúni qyzdyń otbasy ıelik etetin dúkenge jaqyn ornalasqan naýbaıhanada jumys isteıtin sheteldik eńbek mıgrantyn polısıa ustaǵan. Al aýylda baılanys ýaqytsha úzilgende, tártip saqshylary kúzet sharalaryn kúsheıtken.