Keıíngí uaqytta otandyq Qajet Taxi platformasy taksı naryǵynda óz ornyn tabuǵa talpynyp jatyr. Qyzmettíń qazaqsha tarıf ataulary, júrgízushílerden komıssıya almau jospary jáne jergílíktí óním retínde ūsynyluy jūrt nazaryn audardy. Alaıda, jańa servıstíń básekege qabílettí boluy úshín ūlttyq atau men qoljetímdí baǵa jetkílíksíz. Júrgízushíge tıímdí shart, jolaushyǵa yńǵaıly qosymsha jáne tūraqty qyzmet sapasy da mańyzdy, – dep habarlaıdy aqshamnews.kz tílshísí.
«Jaı taksı», «Jaıly taksı» jáne «Sán taksı» dep atalatyn Qajet Taxi qosymshasyndaǵy tarıf ataulary servıstíń kórkín ashqanymen, paıdalanushyǵa, áuelí, kólíktíń uaqytynda keluí, sapar baǵasynyń qoljetímdílígí jáne tapsyrystyń kedergísíz oryndaluy qajet.
Júrgízushíní tarta ala ma?
Qajet Taxi negízín qalaushy Duman Baqytkeldí servıstíń bastapqy kezeńínde júrgízushílerden komıssıya almau jospary bar ekenín aıtqan. Onyń sózínshe, jolaushy men júrgízushí tólemdí ózara tíkeleı júzege asyrady. Keıín platforma tūraqty jūmys ístep, paıdalanushylar sany artqan jaǵdaıda aılyq nemese jyldyq jazylym júıesíne kóshu qarastyryluy múmkín.
«Jobanyń bastapqy kezeńínde júrgízushílerden komıssıya almaudy josparlap otyrmyz. Jolaushy men júrgízushí tólemdí ózara tíkeleı júzege asyrady. Keıín servıs tūraqty jūmys ístep, paıdalanushylar sany artqan jaǵdaıda aılyq nemese jyldyq jazylym júıesíne kóshudí qarastyramyz. Būl júrgízushíge ár sapardan túsken tabysyn paıyzdyq komıssıyasyz saqtauǵa múmkíndík beredí», – deıdí Duman Baqytkeldí.
Komıssıya almau júrgízushíler úshín tıímdí ūsynys boluy múmkín. Bíraq taksı naryǵynda júrgízushíní tartu men ony platformada tūraqty ūstap qaludyń aıyrmashylyǵy bar. Júrgízushí úshín tapsyrystyń sany, bos júretín uaqyt, janarmaı shyǵyny jáne kúndelíktí tabys kólemí de mańyzdy.
Qarjy sarapshysy Aıbar Oljaıdyń píkírínshe, Qajet-tíń Almatydaǵy taksı naryǵynyń 10 paıyzyn ıelenuge múmkíndígí bar. Alaıda būl maqsatqa jetu úshín servıstíń ekonomıkalyq artyqshylyǵyn dáleldeuí qajet. Sarapshy atap ótkendeı, qalyptasqan platformalardyń básekelík basymdyǵy tek tanymal atauynda emes. Olardyń paıdalanushylar bazasy, júrgízushíler jelísí, tapsyrysty bólu algorıtmderí men qalyptasqan qyzmet kórsetu júıesí bar. Sondyqtan jańa servıs úshín tómen baǵa ūsynumen shektelmeı, júrgízushíler men jolaushylardy tūraqty paıdalanushyǵa aınaldyru mańyzdy. Eger Almatydaǵy taksı qyzmetteríníń 2025 jylǵy jalpy kírísí 47,4 mlrd. teńge bolsa, onyń 10 paıyzy shamamen 4,74 mlrd. teńgege teń. Bíraq būl – yqtımal naryqtyq úleske negízdelgen esep qana. Ony Qajet-tíń naqty tabysy nemese qol jetkízgen nátıjesí dep qarastyruǵa bolmaıdy.
Naryqtaǵy báseke qatań
Qajet Taxi turaly píkírler áleumettík jelíde de talqylanyp jatyr. Threads jelísínde Asylhan Saǵymbaı esímdí oqyrman otandyq ónímníń paıda boluyn qūptaı otyryp, servıstíń qazírgí múmkíndíkteríne syn aıtty.
«Qazaq ónímí shyqqany dūrys. Bíraq álí de Qajet – shıkí, píspegen óním. Múmkín, uaqyt pen qarjy kelgende damıtyn shyǵar degen úlken úmít bar», – dep jazdy ol.
Avtordyń píkírínshe, platformanyń aldynda júrgízushílerge tıímdí jaǵdaı qalyptastyru jáne jolaushylarǵa yńǵaıly qyzmet ūsynu sekíldí ekí negízgí míndet tūr. Asylhan Saǵymbaı júrgízushílerdí ūstap tūru úshín qarjylaı yntalandyrudyń mańyzyna toqtalǵan. Onyń aıtuynsha, Yandex-tíń básekelík artyqshylyqtarynyń bírí – júrgízushílerge arnalǵan bonus júıesí. Al Qajet-te ázírge mūndaı yntalandyru tetíkterí jetkílíksíz dep sanaıdy. Syn avtory jolaushynyń sūranysyna da nazar audarypty. Onyń píkírínshe, paıdalanushy úshín kólíktíń tez keluí, kartada mekenjaıdyń dūrys kórsetíluí, bonus júıesí men tólemníń yńǵaılylyǵy mańyzdy.
Jańa servıstíń aldynda tūrǵan taǵy bír míndet – tehnıkalyq tūraqtylyq. Qajet-ke qatysty jarıyalanymdarda keıbír paıdalanushylar júrgízushí tabu qıyndyǵy men kólíktíń kelu uaqytyn boljaudaǵy dálsízdíkke baılanysty shaǵym aıtqan. Mūndaı máseleler barlyq saparda kezdesedí dep aıtuǵa negíz joq, alaıda alǵashqy paıdalanushylardyń tájírıbesí platformanyń bedelíne áser etuí múmkín.
Kúní keshe Qajet Taxi ókílderí Qazaqstan Respublıkasynyń Jasandy ıntellekt jáne tsıfrlyq damu mınıstrí Jaslan Mádıevpen kezdestí. Duman Baqytkeldíníń aıtuynsha, olar mınıstrlík shaqyruymen Úkímet úıíne barǵan. Kezdesude servıstíń máselelerí talqylanyp, bírqatar mańyzdy sūraq jauapty tūlǵalarǵa tapsyrylǵan. Degenmen, būl kezdesudíń nátıjesínde Qajet-ke qandaı naqty kómek kórsetíletíní, memlekettík qarjylandyru nemese arnaıy qoldau tetíkterí qarastyrylyp-qarastyrylmaǵany ázírge belgísíz.
Taksı qyzmetí – paıdalanushynyń senímí men kúndelíktí tájírıbesíne tíkeleı táueldí naryq. Jolaushy úshín kólíktíń qansha mınutta keletíní, sapar baǵasy, qauípsízdík jáne tólemníń yńǵaılylyǵy mańyzdy bolsa, júrgízushí úshín tapsyrystyń tūraqtylyǵy men taza tabys kólemí sheshushí ról atqarady. Qajet Taxi-díń otandyq joba boluy jáne qazaq tílíndegí tarıfterdí ūsynuy – nazar audaruǵa tūrarlyq árí qoldau tabuy kerek bastama. Demek, «Qajet» taksı naryǵynda óz ornyn taba ala ma degen sūraqtyń jauaby ázírge ashyq.
Dana SADYRQAN