QR Premer-mınıstríníń bírínshí orynbasary Nūrlybek Nálíbaev Astanadaǵy medıtsınalyq nysandardyń qūrylys barysymen tanysty. Memleket basshysy elordadaǵy demografıyany eskeríp, onyń qarqynyna ílesu úshín medıtsına ınfraqūrylymyn damytudy, medıtsınalyq qyzmettí sapaly, qoljetímdí etudí tapsyrǵan bolatyn.
Qala halqynyń sany ósíp, qoldanystaǵy auruhanalar men emhanalarǵa túsetín júkteme artqandyqtan, medıtsınalyq mekemeler qatary da kóbeyude. Bıyl №2 qalalyq kópbeıíndí auruhana janyndaǵy jańa qabyldau-dıagnostıkalyq keshení men №2 kópbeıíndí qalalyq balalar auruhanasy janyndaǵy balalar travmatologıyalyq punktí paıdalanuǵa beríledí. Qalǵan nysandar – perınataldyq ortalyq, kópbeıíndí auruhana jáne úsh emhana kezeń-kezeńímen íske qosylady.
Aldymen Premer-mınıstrdíń bírínshí orynbasary perınataldyq ortalyqtyń qūrylysymen tanysty. Nysan aldaǵy jyly ashylady, 250 tósektík jańa zamanauı perınataldyq ortalyqta júktí jáne bosanatyn áıelderge, jańa tuǵan nárestelerge mamandandyrylǵan kómek kórsetu múmkíndígí keńeıedí. Sonymen qatar qazír jūmys ístep tūrǵan bosanu ūıymdaryndaǵy júkteme azayady. Saryarqa audanyndaǵy 300 tósektík kópsalaly qalalyq auruhananyń qūrylysyn ayaqtau jáne ashu josparlanuda. Jańa statsıonar íske qosylǵan soń, elordadaǵy tósek qory ūlǵaıyp, eresek tūrǵyndarǵa mamandandyrylǵan medıtsınalyq kómek qoljetímdí bola túsedí. Al №2 qalalyq kópbeıíndí auruhananyń janynan ashylatyn jańa qabyldau-dıagnostıkalyq keshenínde eresekterdíń qabyldau bólímí, akusherlík qabyldau bólímí, dıagnostıkalyq qyzmet pen travmatologıyalyq punkt ornalasady. Bes qabatty nysan táulígíne 700-900 adamdy qabyldaı alady. Eń bastysy, bír keshenníń íshínde alǵashqy tekseríluden bastap, dıagnoz qoyu, ota jasatu, emdí jalǵastyruǵa deıíngí shūǵyl kómektíń barlyq kezeńínen ótuge bolady. Būl mamandandyrylǵan medıtsınalyq kómektíń qoljetímdílígí men tıímdílígín arttyrady. Mūnda kompyuterlík tomografıya, MRT, rentgenodıagnostıka, angıografıyalyq operatsıyalyq bólme, operatsıyalyq zaldar, ınsult ortalyǵy, travmatologıya bólímshelerí, reanımatsıya jáne qarqyndy terapıya bólímshelerí qarastyrylǵan.
Bıyl №2 kópbeıíndí qalalyq balalar auruhanasynda shūǵyl travmatologıyalyq kómek kórsetuge arnalǵan jańa qosymsha ǵımarat ta ashylady. Onda reanımatsıya zaly, operatsıya bólímí, kompyuterlík tomografıya jáne rentgendıagnostıka kabınetterí jabdyqtalady. Jaraqat alǵan balalardy zamanauı qūrylǵylarmen tekseru, emdeu múmkíndígí artady. Būl balalardy tıístí bólímderge baǵyttau tártíbín ońtaılandyruǵa jáne medıtsınalyq kómektí jedel kórsetuge jol ashady. Byltyr Ūlttyq shūǵyl medıtsınany úılestíru ortalyǵynyń bazasynda Esíl jáne Nūra audandarynyń tūrǵyndaryna arnalǵan balalar travmatologıyalyq punktí ashylyp, 10 myńnan astam bala medıtsınalyq kómek alǵan.
Alǵashqy medıtsınalyq-sanıtarıyalyq kómek kórsetu jelísí de keńeıíp, Astananyń ósíp kele jatqan audandarynda bír auysymda 500 adam qabyldaıtyn úsh jańa emhana salynady. Būl tūrǵyndardyń tūrǵylyqty jerínde uchaskelík dárígerlerge, beıíndí mamandarǵa qaraluyna, dıagnostıka men profılaktıkalyq tekserulerge baruyna jaǵdaı jasaıdy.
Jobalar júzege asqan soń, medıtsınalyq qyzmettíń emhanadaǵy qabyldaudan bastap kópbeıíndí statsıonarlyq kómekke deıíngí barlyq kezeńí qamtylady.
