Temírtaudyń 4A shaǵynaudanynda búldírshínder robototehnıkany meńgeríp, sazbalshyqtan būıym jasap, Montessorı ádístemesí boıynsha bílím alatyn jańa balabaqsha boı kóteríp jatyr, – dep habarlaıdy aqshamnews.kz tílshísí.
Mūnda damu erekshelíkterí bar balalardyń qatarlastarymen bírge bílím alyp, oınauyna jaǵdaı jasalady. «Qazaqstan halqyna» qorynyń qoldauymen júzege asyrylyp jatqan áleumettík jobanyń ayasynda 320 oryndyq nysannyń tanystyrylymy Respublıka kúní qarsańynda metallurgter qalasynda óttí.
Oblys ákímí Ermaǵanbet Bólekpaevqa balabaqshada balalarǵa qandaı jaǵdaı jasalatyny tanystyryldy.
«Qazaqstan halqyna» qory Temírtauda būryn-sońdy bolmaǵan balabaqshanyń qūrylysyn qarjylandyryp, halyqaralyq standarttarǵa saı bíregeı jobany ūsyndy. Mūnda mektepke deıíngí bílím berudíń zamanauı ádístemelerín engízuge erekshe kóńíl bólínedí. Qordyń seríktesterí tárbıeshíler men pedagogterdí balalardy damytu men oqytudyń ozyq ádísterí boıynsha jūmys ísteuge dayarlaıdy.
Balalardyń jan-jaqty damuy úshín kóptegen qyzyqty múmkíndík qarastyrylǵan. Balabaqshada robototehnıka kabınetí, alǵashqy tájírıbeler jasauǵa arnalǵan STEM keńístígí, beıneleu ónerí sheberhanasy men qysh būıymdaryn jasau studıyasy ashylady. Sonymen qatar kítaphana men qysqy baq bolady.
Jobada ınklyuzıvtí bílím beruge de erekshe nazar audarylǵan. Balabaqshada autızmí, estu, kóru, sóıleu jáne tírek-qımyl apparatynyń būzylystary bar balalar qatarlastarymen bírge tárbıeleníp, bílím ala alatyn toptar qūrylady. Olar úshín qūrǵaq basseınder men taktıldí panelderí bar sensorlyq bólme, logoped pen psıholog kabınetterí, arnaıy jattyǵu qūrylǵylary qarastyrylady. Típtí oıynshyqtar da balalardy kíshkentaı kezínen ózgeshelíkterdí qabyldauǵa úıretetíndeı etíp tańdalady.
Balabaqsha aumaǵynda kóleńkelí qalqalary bar 13 seruen alańy, sport alańy jáne ortaq oıyn aımaǵy salynady.
Qūrylys orny da kezdeısoq tańdalmaǵan. Temírtaudyń eskí bólígínde kóptegen jas maman eńbek etetín írí ónerkásíp kásíporyndary ornalasqan. Būl audanda jańa tūrǵyn úılerge qonystanushylardyń sany da artyp keledí. Qazírdíń ózínde 180 páterlí ekí áleumettík úıge tūrǵyndar qonystanǵan, taǵy 270 páterlí úsh kópqabatty úıdíń qūrylysy júríp jatyr. Sondyqtan jańa balabaqshanyń salynuy kóptegen jas otbasy úshín kópten kútken jańalyq bolmaq.
Nysandy 2027 jyly paıdalanuǵa beru josparlanǵan. Balabaqsha balalarǵa arnalǵan jańa oryndar ashyp qana qoımaı, pedagogterdí, medıtsına jáne tehnıkalyq qyzmet mamandaryn jūmyspen qamtamasyz etedí.
Balabaqsha qūrylysyn ayaqtau ǵana emes, onyń jūmysqa tolyq daıyn boluyn qamtamasyz etu de mańyzdy. Barlyq ınjenerlík kommunıkatsıyalar uaqytyly tartylyp, tıístí jelílerge qosyluy tıís. Qūrylys jūmystarynyń sapasyna erekshe nazar audaru qajet. Osy maqsatta tehnıkalyq jáne avtorlyq qadaǵalau qyzmetterí ár kezeńde tūraqty baqylau júrgízuí kerek. Merzímderdíń būzyluyna jol bermeı, barlyq máselení jedel sheshu qajet, - dedí Ermaǵanbet Bólekpaev.
«Qazaqstan halqyna» qory Qaraǵandy oblysyndaǵy áleumettík jobalarǵa osy uaqytqa deıín 26,3 mlrd teńgeden astam qarajat bólgen. Temírtauda qordyń qoldauymen Álıhan Bókeıhan atyndaǵy gımnazıyanyń materıaldyq-tehnıkalyq bazasy jabdyqtalyp, hımıya, fızıka jáne bıologıya kabınetterí jańartyldy. Sondaı-aq qalanyń 30 mektebíne sport alańdary ornatyldy. Endí qalanyń eń kíshkentaı tūrǵyndary úshín de jańa múmkíndíkter ashylmaq.