Bıyl 15 aqpanda Almaty qalasy ákímdígíníń qoldauymen «Bírínshí bolu - batyldyq» korporatıvtík qory Winter Run-2026 qalalyq júgíru jarysyn ótkízedí. Ís-sharaǵa shamamen 2 500 adam qatysady.
Ūıymdastyru komıtetí jarys ótetín kúní kólík qozǵalysyna uaqytsha íshínara shekteu engízíletíní turaly qala tūrǵyndary men qonaqtaryn aldyn ala habardar etedí. Bıyl on ekínshí ret ūıymdastyrylǵan Winter Run dástúrlí sporttyq ís-sharaǵa aınalǵan.
Jarys «Nūrly-Tau» bıznes ortalyǵynyń janynan bastau alady. Qatysushylar ál-Farabı dańǵyly boıymen Gagarın dańǵylyna deıín júgíríp, kerí būrylyp, bastapqy núktege qaıta oralady. Baǵdarlamada úsh qashyqtyq qarastyrylǵan: 10 shaqyrym, 7 shaqyrym skandınavıyalyq seruen jáne 3 shaqyrym balalar jarysy.
Ís-sharaǵa baılanysty 15 aqpanda kólík qozǵalysyna shekteu engízíledí. Saǵat 04:00-den 12:00-ge deıín Yu. Pomerantsev kóshesíníń ál-Farabı dańǵylynan Gandı kóshesíne deıíngí bólígí jabylady. Saǵat 08:00-den 10:45-ke deıín ál-Farabı dańǵylynyń soltústík jaǵy Meńdíqūlov bulvarynan (tonnelge kíreberís) Serkebaev dańǵylyna deıín jabyq bolady. Ál-Farabı dańǵylynyń ońtústík jaǵy kólík qozǵalysy úshín ashyq. Shyǵys baǵytta balama qozǵalys Tımıryazev kóshesí arqyly ūıymdastyrylady.
Shekteuler jarysqa qatysushylar qozǵalysyn tıímdí úılestírudí jáne sportshylar men tūrǵyndardyń qauípsízdígín qamtamasyz etu maqsatynda engízíledí.
Mūndaı júgíru jarystary álemníń írí megapolısterínde tūraqty túrde ótíp, būqaralyq sport mádenıetín qalyptastyryp, tūrǵyndardy belsendí ómír saltyna tartady. Ūıymdastyrushylardyń aıtuynsha, qor ótkízetín ís-sharalar, sonyń íshínde Almaty Marathon, sport turızmín damytuǵa jáne jergílíktí bıznestí qoldauǵa yqpal etedí.
«Bírínshí bolu - batyldyq» qorynyń zertteuíne sáıkes, marafon ótetín kúnderí myńǵa juyq qatysushy shamamen 8 mln teńgege sauda jasaıdy, al seríktes kompanıyalardyń salyq audarymdary tórt jyl íshínde 318,9 mln teńgeden 873,9 mln teńgege deıín artqan. Ózge óńírlerden kelgen qatysushylardyń shamamen 80%-y Almatyǵa qaıta keludí josparlaıtynyn atap ótken.
Jarys bastalatyn uaqyty:
08:00 — 3 shaqyrym
08:45 — 10 shaqyrym
08:50 — 7 shaqyrym skandınavıyalyq seruen
Sonymen qatar, 27 qyrkúıekte Almatyda Ortalyq Azıyadaǵy eń írí jyl saıynǵy júgíru jarysy – Almaty Marathon ótedí. Qatysushylar úshín 10 shaqyrym, 10 shaqyrym skandınavıyalyq seruen, 21,1 shaqyrym, 42,2 shaqyrym jáne «Ekıden» komandalyq estafetasy qashyqtaǵy qoljetímdí bolady. Tírkeu almaty-marathon.kz saıtynda ashyq.
