QR Parlamentí Májílísíníń deputaty, «AMANAT» partıyasy fraktsıyasynyń múshesí Únzıla Shapaq «Ádílettí jáne Progressıvtí Qazaqstannyń Halyqtyq Konstıtutsıyasy úshín!» Jalpyūlttyq koalıtsıyasynyń alǵashqy jıynynda málímdedí.
Deputat Konstıtutsıyanyń preambulasyn qaıta qarau jónínde ūsynys bíldírgenín atap óttí.
«Ata Zańy myqty eldíń – tūǵyry berík, Tuy bıík. Zaman ózgeredí. Onymen bírge qoǵam da, qūndylyqtar da jańǵyrady. Memlekettíń shynaıy quaty – onyń máńgílík qūndylyqtarynda», – dedí Únzıla Shapaq.
Ol referendumǵa ūsynylyp otyrǵan Konstıtutsıya jobasy Egemendík pen Táuelsízdíktí, aumaqtyq tūtastyq pen memlekettík shekaranyń myzǵymastyǵyn eń joǵary qūndylyq retínde naqty bekítetínín erekshe atap óttí. Sonymen qatar deputat jańa qūjatta eldíń tereń tarıhı tamyryna da aıryqsha mán berílgenín jetkízdí. Onyń aıtuynsha, jańa Ata Zań jobasynda myńjyldyq tarıhymyz alǵash ret myzǵymas ūlttyq qūndylyq retínde tanyldy.
«Qazaq elí – aıbyny asqaq memleketterdíń zańdy mūragerí. Ūlan-ǵaıyr Ūly Dala – kóshpelíler órkenıetíníń altyn besígí. Adamdy ardaqtaǵan, adamı qasıettí qadírlegen Ūly Dalada demokratıyanyń tereń tamyry qalyptasqan. Osy berík dástúrdíń zańdy jalǵasyndaı jańa zań jobasynda adam qūqyqtary men bostandyqtary eń joǵary qūndylyq dep jarıyalandy», – dedí ol.
Deputattyń píkírínshe, «Ádílettí Qazaqstan» ıdeyasynyń ózegí de osy qaǵıdattarmen tíkeleı baılanysty. Sondaı-aq ol ádílettílík, zań men tártíp, tabıǵatty qorǵau – el damuynyń ózegí, memlekettílíktíń tíregí ekenín atap óttí.
«Búgíngí almaǵaıyp zamanda syn-qaterden súrínbeı ótetín jalǵyz jol – ıntellektualdy, ozyq oıly ūlt bolu. Sondyqtan mádenıet pen bílímdí, ǵylym men ınnovatsıyany zańmen bekítu – tarıh aldyndaǵy paryzymyz, bolashaq aldyndaǵy boryshymyz», – dep túıíndedí ol.
Eske sala keteıík, búgín Astanada Konstıtutsıyalyq reformany qoldau maqsatynda «Ádílettí jáne Progressıvtí Qazaqstannyń Halyqtyq Konstıtutsıyasy úshín!» dep atalatyn jalpyūlttyq koalıtsıyasy qūryldy. Onyń qūramyna elímízdegí sayası partıyalar, qoǵamdyq ūıymdar, deputattar, zıyaly qauym ókílderí, jastar bírlestíkterí, kásípodaq ūıymdary jáne taǵy basqalar kírdí.
