Nauryznama onkúndígí ayasynda 18 nauryz – Ūlttyq kıím kúníne oraı Almaty qalasynda taǵylymy mol mádenı ís-shara óttí. Atauly kúnníń mán-mańyzyn arttyru, ūlttyq qūndylyqtardy nasıhattau jáne jastardyń boıynda ūlttyq ruhty qalyptastyru maqsatynda ūıymdastyrylǵan «Ūlttyq kıím – ūlt maqtanyshy» atty sán kórsetílímí kópshílíkke erekshe áser syılady.
Ís-sharany Almaty qalasynyń Ortalyqtandyrylǵan kítaphanalar júıesíne qarasty №20 kítaphana ūjymy men Almaty qalasy Bílím basqarmasyna qarasty Almaty sán jáne qyzmet kórsetu salasy kolledjí bírlesíp ūıymdastyrdy.
Sharanyń ashylu saltanatynda sóz alǵan kolledj dırektorynyń tárbıe ísí jóníndegí orynbasary Omarova Kúnímaı Nūrlybaıqyzy jınalǵan qauymdy Ūlttyq kıím kúnímen qūttyqtap, ūlttyq kıímníń ūlt bolmysyndaǵy erekshe ornyn atap óttí. Ol óz sózínde ūlttyq qūndylyqtardy saqtau men ony jas ūrpaqtyń boıyna síńíru – búgíngí kúnníń basty míndetteríníń bírí ekenín jetkízíp, osyndaı taǵylymdy ís-sharalardyń mańyzdylyǵyna toqtaldy.
Ūlttyq kıím kúní – halqymyzdyń baı mádenı mūrasyn, salt-dástúrín, ūlttyq bolmysyn aıshyqtaıtyn erekshe mereke. Būl kúní ata-babamyzdan mıras bolyp qalǵan ūlttyq kıímderdíń kórkemdígí, olardyń árbír oyu-órnegíníń tereń maǵynasy men tárbıelík mání keńínen nasıhattalady.
Shara barysynda kolledj studentterí qazaq halqynyń dástúrlí kıím úlgílerín zamanauı sánmen úılestíre otyryp, kórermender nazaryna ūsyndy. Ásírese, jas erekshelíkteríne saı daıyndalǵan kıím toptamalary ūlttyq naqysh pen qazírgí stıldíń úılesímín aıqyn kórsettí. Sán kórsetílímí kórermenderge estetıkalyq áser syılap qana qoımaı, ūlttyq kıímge degen qyzyǵushylyqty arttyra tústí.
Ís-sharaǵa arnaıy shaqyrylǵan qonaqtar – «Senímen Bolashaq» respublıkalyq qoǵamdyq bírlestígíníń Almaty fılıaly men «Qazaq analary – dástúrge jol» respublıkalyq qoǵamdyq bírlestígíníń ókílderí de ūlttyq qūndylyqtardyń mańyzdylyǵyna toqtalyp, jastarǵa ózderíníń aqjarma tílekterín bíldírdí. Ájelerímíz ūlttyq tárbıe men salt-dástúrdíń sabaqtastyǵy jaıly taǵylymdy oılarymen bólístí.
Atalǵan shara ūlttyq mádenıettí saqtau men dárípteude mańyzdy ról atqaryp, jas ūrpaqtyń ūlttyq qūndylyqtarǵa degen qūrmetín arttyruǵa óz úlesín qosty. Sonymen qatar, ūlttyq kıímdí zamanauı sánmen ūshtastyru arqyly onyń ómírsheńdígín dáleldeı tústí.
Ūlttyq kıím – halqymyzdyń ruhanı bolmysy men mádenı kodynyń ajyramas bólígí. Sondyqtan mūndaı ís-sharalar ūlttyq mūrany jańǵyrtyp qana qoımaı, el bírlígín nyǵaıtyp, ūlt maqtanyshyna aınalary sózsíz.
Almaty sán jáne qyzmet kórsetu salasy kolledjíníń
kítaphana meńgerushísí Jandar Sáule Ilıyasqyzy