Jazdyń kelýimen birge almatylyqtar ashyq aýada serýendep, demalyp, kúnge qyzdyrynýǵa asyǵady. Alaıda dárigerler eskertedi: últrakúlgin sáýleler terige zıan keltirip, qaterli isikke ákelýi múmkin.
Qaýip qandaı?
Dúnıejúzilik densaýlyq saqtaý uıymynyń derekterine sáıkes, jyl saıyn álemde teriniń melanoma emes qaterli isiginiń 3 mıllıonnan astam jáne melanomanyń 130 myńnan astam jańa jaǵdaıy tirkeledi. Melanoma – eń qaýipti ári jyldam taralatyn isikterdiń biri.
Almaty Onkologıalyq ortalyǵynyń onkology Nazıra Bıjanovanyń aıtýynsha, últrakúlgin sáýleler teri jasýshalaryn zaqymdap, mýtasıaǵa jáne qaterli isiktiń damýyna sebep bolady. Ashyq terili adamdar, meńderi kóp jandar, kún astynda nemese solárııde kóp bolatyndar táýekel tobynda.
Qalaı qorǵanýǵa bolady?
Dárigerler kúnnen qorǵanýdyń qarapaıym, biraq tıimdi joldaryn usynady:
-
SPF 30 nemese odan joǵary qorǵanys deńgeıi bar kúnnen qorǵaıtyn krem qoldaný;
-
Basyńyzdy jabatyn qalpaq, kózildirik, ıyq pen qoldy jabatyn kıim kıý;
-
Saǵat 11:00–16:00 aralyǵynda kún astynda bolýdan aýlaq bolý;
-
Bultty kúnderi de qorǵanýdy umytpaý.
Eger terińizde meńniń pishini nemese túsi ózgerse, jańa daqtar, qyshý, qabyrshaqtaný nemese qan ketý baıqalsa – mindetti túrde dermatologqa ne onkologqa kórinińiz.
Teri qaterli isigi erte kezeńde anyqtalsa, tıimdi emdeledi. Sondyqtan der kezinde tekserilip, qorǵaný sharalaryn ustaný – densaýlyǵyńyzdy saqtaýdyń basty joly.
Jaz – qýanysh pen demalys mezgili. Shýaqty kúnderdi densaýlyqqa zıansyz, aqylmen ótkizińiz. Ózińizge jáne jaqyndaryńyzǵa qamqor bolyńyz!