Óńírlík kommunıkatsıyalar qyzmetí alańynda «Íle-Balqash» memlekettík tabıǵı rezervaty bas dırektorynyń orynbasary Amanjol Úrkínbaev 2026 jylǵy órt qaupí joǵary mausymǵa daıyndyq pen tabıǵı aumaqtyń qauípsízdígín qamtamasyz etu boıynsha qola alynǵan jūmysty bayandady, – dep habarlaıdy aqshamnews.kz tílshísí.
Onyń aıtuynsha, daıyndyq sharalary tolyq kólemde júrgízílgen. Memlekettík organdar men ūıymdardyń bírlesíp jūmys ísteıtín jospary ázírleníp, bekítíldí. Sondaı-aq jergílíktí atqarushy organdarmen bírlesíp eríktí órtke áreket etetín qarsy qūrylymdar da jasaqtaldy.
«Yqtımal tótenshe jaǵdaıǵa daıyndyq deńgeıín arttyru maqsatynda jūmys memlekettík organdarmen, kórshíles orman sharuashylyqtarymen jáne jergílíktí qauymdastyqtarmen tyǵyz ózara ís-qımyl negízínde ūıymdastyryldy», – dedí Amanjol Úrkínbaev.
Órt qaupín tómendetu maqsatynda rezervattyń Balqash pen Íle bólímsheleríníń aumaǵynda jalpy kólemí 300 gektar jerde baqylaumen profılaktıkalyq órteu jūmysy júrgízíldí. Būl órtke qarsy tosqauyl qalyptastyruǵa múmkíndík beredí.
Mıneraldandyrylǵan jolaqtardy jasau men kútíp ūstau jūmysy da jalǵasyp jatyr. Josparlanǵan 120 shaqyrymnyń búgíngí kúnge deıín 60 shaqyrymy oryndaldy. Sonymen qatar su aıdyndary men aılaqtarǵa aparatyn kíreberís joldar jóndelíp, qajet bolǵan jaǵdaıda avıatsıyanyń sudy jedel aluyna jaǵdaı jasaldy.
Profılaktıkalyq jūmysqa da erekshe kóńíl bólíngen. Jyl basynan berí būqaralyq aqparat qūraldarynda toǵyz materıal jarıyalanyp, 40 eskertu haty men 60 aqparattyq jadynama taratyldy. Memlekettík ınspektorlar jergílíktí tūrǵyndar men demalushylar arasynda tūraqty túrde reıdter ótkízíp, túsíndíru jūmystaryn júrgízude.
Spıkerdíń aıtuynsha, rezervat qajettí tehnıkamen jáne jabdyqpen tolyq qamtamasyz etílgen. Mekeme ıelígínde órt sóndíru tehnıkasy, arnauly avtokólíkter, traktorlar, baılanys qūraldary men ózge de qajettí jabdyq bar. Shalǵaı uchaskelerde tūraqty baılanysty qamtamasyz etu úshín úsh Starlink termınaly ornatylǵan. Sonymen qatar kólemí 1 200 lıtr bolatyn janar-jaǵarmaı materıaldarynyń qory jasaqtalǵan.
«Materıaldyq-tehnıkalyq bazany nyǵaıtu men aldyn alu júıesín jetíldíru baǵytyndaǵy jūmys alda da jalǵasady», – deıdí Amanjol Úrkínbaev.