Úlken Almaty aınalma avtomobıl jolymen túıisetin joldar máselesi talqylandy
Úlken Almaty aınalma avtomobıl jolymen túıisetin oblys aýmaǵyndaǵy radıaldy joldardyń qurylysyna qatysty Almaty oblysynyń ákimi Amandyq Batalov jobaǵa qatysýshy irgeli mekemeniń biri «Alsim Alarko» kompanıasynyń ókilderimen kezdesý ótkizdi, dep habarlaıdy Almaty-akshamy.kz Almaty oblysy ákiminiń baspasóz qyzmetiniń habaryna silteme jasap.
Kezdesý barysynda oblys ákiminiń orynbasary Jeńis Tuıaqov Almaty qalasy shekarasynan bastap ÚAAAJ-ǵa deıin salynatyn oblys aýmaǵyndaǵy 6 radıaldy joldyń qurylysyna qatysty jumystardyń jaı-kúıinen qysqasha habardar etti. Jalpy, Qarasaı men İle aýdandarynyń aýmaǵy arqyly alyp jolǵa túıisýi tıis 6 joldyń uzyndyǵy 36 shaqyrym. Osy 6 joldyń 5-eýiniń jobasy memlekettik saraptamanyń oń qorytyndysyn alǵan. Iaǵnı, Abaı, Saın, Rysqulov, Tilendıev jáne Soltústik jartylaı aınalma joldarynyń jobasy daıyn. Al Aqyn Sara kóshesiniń jobasyna Almaty qalasynyń Bas josparynyń ózgerýine baılanysty túzetýler engizilýde. Ázirge Saın kóshesi boıynsha jer ýchaskeleriniń máselesi tolyq sheshilgen. Qurylys jumystaryna 2,7 mlrd. teńge bólingen.
Kezdesýge arnaıy kelgen «Alsim Alarko» kompanıasy bas dırektorynyń orynbasary Abbas Shahın ózderiniń ÚAAAJ jobasyna qatysýshy retinde oblystyń radıaldy joldarynyń qurylysyna baılanysty óz usynystaryn jetkizdi. ÚAAAJ qurylysy aıaqtalǵanǵa deıin oǵan kelip túıisetin joldardyń da tolyq daıyn bolýyna bar kúsh-jigerin jumsaıtyn nıetterin bildirdi.
Amandyq Batalov qurylys salasynda tájirıbesi mol merdiger uıymnyń oblyspen seriktestik baılanystaryn nyǵaıtý týraly usynystaryna rızashylyǵyn bildirdi. Áńgimelesý barysynda oblys ákimi kompanıanyń qurylys konstrýksıalarynyń qaıdan ákelinetinin, qansha jumysshy jumys istep jatqanyn surap bildi. Kompanıa ókili Abbas Shahınniń aıtýynsha, qurylys jumystarynda 1100-ge jýyq adam jumys isteıdi. Sonyń 93%-i jergilikti mamandar. Jıyn barysynda «Alsim Alarko» kompanıasynyń ÚAAAJ jobasyn iske asyrý jumystary týraly shaǵyn beınerolık kórsetildi.
Oblys basshysy radıaldy joldardyń qurylysyn júzege asyrý jobasynyń seriktestik sharttary Úkimet deńgeıinde talqylanyp, tıisti sheshim qabyldanatynyn aıtty.
- Úlken Almaty aınalma avtomobıl joly – óte aýqymdy joba. Sondyqtan bul jobanyń sheńberinde tájirıbesi mol, tehnıkasy kóp, mamandary jetkilikti osyndaı iri merdiger kompanıamen jumys isteý bizge de tıimdi. Eki tarap ta isti naqty, sapaly, der kezinde atqarsa, sonyń nátıjesinde jasalǵan jumys halyqtyń ıgiligine aınalsa, biz úshin basty maqsat sol, - dedi Amandyq Batalov.
Jıyn barysynda «Alsim Alarko» kompanıasy ókilderi jeńil relsti kólik qatynasy qurylysyna, elektr energıasy salasyna qatysty da jobalarǵa qatysýǵa áleýeti bar ekendikterin aıtty. Bul rette oblys basshysy atalǵan qurylys uıymyn joǵarǵy Talǵar jáne joǵarǵy Qaskeleń trassalarynyń rekonstrýksıalaý jumystaryna, Taldyqorǵandaǵy «Basqýat» qazandyǵyn qaıta jańǵyrtý isine tartýǵa bolatynyn aıtyp, tıisti sala mamandaryna arnaıy tapsyrma berdi. Óńirdegi atalǵan salalardyń laýazymdy tulǵalary men qala ákimdigi «Alsim Alarko» kompanıasy mamandarymen kezdesip, máselelerdi egjeı-tegjeıli talqylaıtyn bolady.