Premer-mınıstrdíń orynbasary – ūlttyq ekonomıka mınıstrí Serík Jūmanǵarın front-ofıstíń ashyluyna qatysyp, bıznestí qoldaudyń jańa formatymen tanysty.
Bíryńǵaı front-ofıs «Báıterek» toby ūıymdarynyń qoldau qūraldaryn «bíryńǵaı tereze» qaǵıdaty boıynsha bíríktíredí. Mūnda kásípkerler keńes alyp, qolaıly qoldau qūralyn tańdaı alady. Ótíním berílíp, qarjylandyru qarastyryluǵa deıín joba súıemeldenedí.
Front-ofıster Qazaqstannyń barlyq óńírínde «Damu» qorynyń fılıaldary bazasynda jūmys ísteıdí. Shalǵaı jatqan audandar men auyldardaǵy kásípkerler úshín mamandardyń audandarǵa baruyna arnalǵan mobıldí keńseler – avtobustar qarastyrylǵan. Osylaısha, óz ókíldíkterí joq keıbír damu ınstıtuttarynyń qajettí keńesí men qoldauyn oblys ortalyǵyna barmaı-aq aluǵa bolady.
Front-ofıs konsultanttary «Báıterek» tobynyń ūıymdarǵa kórsetetín qoldau qūraldary boıynsha aqparat beredí:
- «Damu» kásípkerlíktí damytu qory – shaǵyn jáne orta bıznestí jeńíldíkpen nesıelendíru, paıyzdyq mólsherlemení subsıdıyalau, kepíldík beru jáne qoldaudyń qarjylyq emes sharalary;
-
Qazaqstannyń Damu bankí – írí ınvestıtsıyalyq jobalardy qarjylandyru;
-
Qazaqstan Investment Corporation – tíkeleı ınvestıtsıyalar jáne venchurlyq qarjylandyru qūraldary;
-
Qazaqstannyń eksporttyq-kredıttík agenttígí – eksporttyq nesıelerdí saqtandyru;
-
Ónerkásíptí damytu qory – kásíporyndardy jańǵyrtuǵa arnalǵan jeńíldíktí jáne lızıngtík qarjylandyru.
«Búgíngí tańda bízdíń mamandarymyz tek Qordyń qūraldarymen jūmys ístep qoımaı, “Báıterek” holdıngíníń basqa da ūıymdary ūsynatyn sheshímderdí tańdauǵa kómektesedí. Shyn mánínde, “Damu” qorynyń óńírlík jelísí jeńíldíkpen nesıelendíru men kepíldíkterden bastap, ınvestıtsıyalyq qarjylandyruǵa, eksportty saqtandyru men lızıngke deıíngí qarjylyq jáne qarjylyq emes qūraldardyń keń auqymyna qol jetkízudíń bíryńǵaı terezesíne aınalyp keledí», — dedí «Damu» qorynyń basqarma tóraǵasy Farhat Sársekeev.
Bíryńǵaı front-ofıstíń tehnıkalyq íske qosyluy osy jylǵy aqpanda óttí. Osy uaqyt íshínde konsultanttar kásípkerlerdíń 30 myńǵa juyq ótíníshín qabyldaǵan. Front-ofıs arqyly 1 250 joba súıemeldeníp, qarjylandyryldy.
Bíryńǵaı front-ofıs bazasynda Bıznestí qoldau jáne súıemeldeu ortalyqtary da pılottyq rejımde jūmys ísteude. Olardyń míndetí – kásípkerlerge memlekettík organdarmen, qarjy ınstıtuttarymen jáne basqa da ūıymdarmen ózara ís-qımyldy talap etetín naqty máselelerdí sheshuge járdemdesu.
Ortalyq mamandary máselení bastapqy taldaudan ótkízíp, ony sheshudíń yqtımal jolyn anyqtaıdy. Qajet bolǵan jaǵdaıda jūmysqa salalyq memlekettík organdar, qarjy ınstıtuttary, ákímdíkter men «Báıterek» tobynyń ūıymdary tartylady. Pılottyq joba Astana, Almaty, Shymkent qalalaryn, Soltústík Qazaqstan jáne Aqtóbe oblystaryn qamtuda.
«Mūndaı qoldaudyń barlyq óńírde boluy mańyzdy. Bíz kásípkerlerdí qoldau tásílín neǵūrlym tıímdí ete otyryp, “Ísker aımaq” baǵdarlamasyn auyldarǵa taratudy josparlap otyrmyz. Būl rette “Damu” qorynyń óńírlík fılıaldary men mobıldí front-ofısterí úlken ról atqaruy tıís. Konsultanttardyń míndetí – bıznestíń qalyptasuy men damuynyń barlyq kezeńín súıemeldeu. Taǵy bír mańyzdy baǵyt – bıznestí qoldau jáne súıemeldeu ortalyqtary. Kásípkerler problemalarmen jıí betpe-bet keledí. Bíraq qaıda júgínudí, qalaı sheshudí bílmeı jatady. Ortalyqtar osyny jolǵa qoyu úshín qūryluda. Ázírge olar elímízdíń bes óńírínde pılottyq rejımde jūmys ístep jatyr», — dep atap óttí Serík Jūmanǵarın.
