Premer-Mınıstrdíń orynbasary – Mádenıet jáne aqparat mınıstrí Aıda Balaevanyń tóraǵalyǵymen Innovatsıyalardy damytu jóníndegí keńestíń (Innovatsıyalyq shtab) alǵashqy otyrysy óttí, – dep habarlaıdy aqshamnews.kz tílshísí.
Jıynǵa Ǵylym jáne joǵary bílím mınıstrí Sayasat Nūrbek, oblystar men qalalar ákímderíníń orynbasarlary, memlekettík organdardyń, sondaı-aq bıznes qauymdastyq ókílderí qatysty.
Innovatsıyalyq shtab Premer-Mınıstrdíń tapsyrmasy boıynsha qūryldy. Onyń negízgí míndetí – ınnovatsıyalyq qyzmet salasyndaǵy vedomstvoaralyq úılestírudí qamtamasyz etu jáne eldíń tehnologıyalyq basymdyqtaryn aıqyndau.
Otyrysta Qazaqstan Respublıkasynda ınnovatsıyalardy damytudyń tūjyrymdamalyq máselelerí qaraldy. Atap aıtqanda, memlekettík qoldau qūraldaryn jetíldíru, óńírlík ınnovatsıyalyq júıelerdí damytu jáne kadrlyq áleuettí kúsheıtuge baǵyttalǵan sharalar talqylandy.
Būl jūmys nátıjesínde ınnovatsıyalyq belsendílíktí arttyruǵa, Qazaqstannyń Jahandyq ınnovatsıyalar ındeksíndegí ornyn nyǵaıtuǵa, jańa salalardy damytuǵa, joǵary tehnologıyalyq jūmys oryndaryn qūruǵa jáne qosylǵan qūny joǵary óním eksportyn ūlǵaıtuǵa múmkíndík beretín basqarylatyn ınnovatsıyalyq júıe qalyptastyru kózdelíp otyr.
Jańa modeldíń negízgí ıdeologıyalyq ózegí – «Innovatsıyany ǵylym arqyly damytu» tásílínen «Ǵylymdy ınnovatsıya arqyly damytu» qaǵıdatyna kóshu. Onyń mání – daıyn ozyq tehnologıyalardy ıgeríp, el jaǵdaıyna beıímdeu jáne osy negízde otandyq ǵylymdy damytu. Yaǵnı memleket protsestíń ózíne emes, naqty nátıjege qarjy baǵyttaıdy.
Jıyn qorytyndysy boıynsha Innovatsıyalardy damytu tūjyrymdamasynyń negízgí tásílderí maqūldanyp, memlekettík organdarǵa, ákímdíkterge jáne bıznes-sektor ókílderíne qūjat jobasyna naqty ūsynystar engízu jónínde tıístí tapsyrmalar beríldí.
Sonymen qatar barlyq óńírde múddelí taraptardyń qatysuymen ǵylymı-tehnologıyalyq sessıyalar ótkízu kestesín bekítu tapsyryldy. Būl sessıyalar bıznestíń naqty tehnologıyalyq sūranystaryn aıqyndauǵa baǵyttalmaq.