Úkimet Arqalyqtyń jylý jelilerin rekonstrýksıalaý men jańǵyrtýǵa qarajat bóldi, - dep habarlaıdy aqshamnews.kz.
Memleket basshysy Qasym-Jomart Toqaevtyń ınfraqurylymdyq damýdyń jańa deńgeıine kóshý jónindegi tapsyrmalaryn iske asyrý sheńberinde Úkimet óńirlerdegi jylý jelilerin rekonstrýksıalaýdy jalǵastyrýda.
Qostanaı oblysy Arqalyq qalasynyń jylý jelilerinde jóndeý jumystaryn aıaqtaý úshin Úkimet rezervinen shamamen 250 mln teńge bólindi. Tıisti Qaýlyǵa Premer-mınıstr Oljas Bektenov qol qoıdy.
Arqalyq JEO 375 ǵımaratqa qyzmet kórsetedi jáne komýnıkasıalardyń joǵary tozýyna baılanysty qyzyl aımaqtaǵy jylý kózderiniń tizimine kiredi.
Qalanyń jylý jelileriniń uzyndyǵy 34,7 shaqyrymdy quraıdy, onyń kóp bóligi 1990 jyly paıdalanýǵa berilgen. Búgingi tańda tozý 48%-dy quraıdy, keıbir ýchaskelerde 82%-ǵa deıin jetken, bul jylytý maýsymynda jylý energıasynyń 24-29%-ǵa deıin bolmaýyna ákeledi.
2023 jyldan bastap qalada jylý kózderin jańǵyrtý boıynsha jobanyń ekinshi kezeńi júzege asyrylýda. Búgingi tańda 17 shaqyrym jylý jelileri aýystyryldy. 2025 jyly taǵy 9,9 shaqyrym jańartý josparlanýda. Jumystar kezeń kezeńmen júrgizilýde. Joba aıaqtalǵannan keıin jalpy tozý 12%-ǵa tómendeıdi dep kútilýde.
Júrgizilip jatqan jańǵyrtý jumystary jylytý maýsymynyń qalypty ótýin jáne halyq sany 38,4 myń adamdy quraıtyn Arqalyq qalasynyń tirshilikti qamtamasyz etý júıeleriniń turaqty jumys isteýi úshin mańyzdy mánge ıe.
Esterińizge sala keteıik, sońǵy jyldary Arqalyq qalasy áleýmettik-ekonomıkalyq damýdyń negizgi baǵyttarynda oń dınamıkany kórsetip otyr. Shaǵyn jáne orta bıznes jandanyp, halyq sany ósýde, bilim berý, densaýlyq saqtaý jáne áleýmettik saladaǵy jaǵdaılardy jaqsartý boıynsha birqatar shara qabyldanýda.
2024-2025 jylytý kezeńine daıyndyq sheńberinde jabdyqtarǵa, jylý jáne elektr berý jelilerine kúrdeli jóndeý júrgizildi. Óńirde tozýdy odan ári azaıtý úshin osy jyly jalpy uzyndyǵy 27,9 shaqyrym jylý trassasyn qaıta jańartý boıynsha 22 joba júzege asyrylýda.
Osy aıda Arqalyq qalasynda strategıalyq mańyzdy «Ortalyq – Batys» avtojol dáliziniń qurylysy bastaldy.
Joba Prezıdent Qasym-Jomart Toqaevtyń Ulttyq quryltaıdyń IV otyrysynda aıtylǵan tapsyrmasyn oryndaý sheńberinde júzege asyrylýda jáne Úkimettiń elimizdiń kólik ınfraqurylymy men tranzıttik áleýetin damytý jónindegi josparlaryna kiredi.
Uzyndyǵy 865 shaqyrym bolatyn jańa marshrýt eldiń ortalyǵy men batysy arasyndaǵy tikeleı baılanysty qamtamasyz etedi jáne Transkaspıı halyqaralyq kólik baǵytyna shyǵýdy qamtamasyz etedi. «Astana – Janteke – Egindikól – Arqalyq – Torǵaı - Yrǵyz» avtojoly Astana men Yrǵyz aýyly arasyndaǵy qashyqtyqty 573 shaqyrym qysqartýǵa múmkindik beredi jáne irgeles aýmaqtardyń ekonomıkalyq damýyna ári jergilikti halyqtyń turmys jaǵdaıyn jaqsartýǵa aıtarlyqtaı serpin beredi.
Logıstıkalyq jelini qurý aımaqtyń, ásirese onyń ońtústik aýdandarynyń jáne jalpy eldiń damýy úshin mańyzdy faktor bolady.
Sondaı-aq «jasyl» energetıkany damytý jáne qala áýejaıyn qalpyna keltirý jobalary mańyzdy bolady.