Aýdandyq veterınarıa mamandary men aýyl turǵyny aqparattyq júıede shyn máninde joq shamamen 100 myń bas usaq maldy tirkep, 271 mln teńge sýbsıdıany jymqyrǵan, - dep habarlaıdy Aqshamnews.kz/kz tilshisi. Bul týraly Bas prokýratýranyń baspasóz qyzmeti habarlady.
Qadaǵalaý organynyń málimetinshe, veterınarlyq qyzmettiń tórt qyzmetkeri jergilikti turǵynmen sóz baılasyp, birneshe sharýa qojalyǵynyń atyna jalǵan mal engizgen. Sonyń nátıjesinde olar búdjetten júzdegen mıllıon teńgeni zańsyz shyǵaryp, qarajatty ózara bólisken.
Túrkistan qalalyq soty bes adamdy alaıaqtyq pen qujattardy qoldan jasaý boıynsha kináli dep tanydy. Tórteýine 5,2 jylǵa bas bostandyǵynan aıyrý jazasy taǵaıyndaldy. Taǵy bireýine bostandyqty shekteý jazasy berilgenimen, keıin oǵan qatysty is raqymshylyq aktisine baılanysty toqtatyldy.
Memleket paıdasyna 50 mln teńge óndirilip, quny 120 mln teńgege baǵalanatyn múlikke tyıym salyndy. Prokýratýra sýbsıdıa qarjysyn jymqyrý úshin 10 jylǵa deıin bas bostandyǵynan aıyrý jazasy qarastyrylǵanyn eske saldy.