Túrkistan oblysynyń Jetisaı aýdandyq sotynda qart ákesin júıeli túrde uryp-soǵyp kelgen jergilikti turǵynǵa qatysty rezonans týdyrǵan qylmystyq is aıaqtaldy, - dep habarlaıdy aqshamnews.kz tilshisi.
16 qańtarda sot aıyptalýshyny Qylmystyq kodekstiń eki baby boıynsha kináli dep tanydy:
- 110-baptyń 2-bóligi 1-tarmaǵy "Kórineý kámeletke tolmaǵan adamǵa nemese kináli adamǵa dármensiz kúıde ekeni kórineý belgili ne kináli adamǵa materıaldyq nemese ózgedeı táýeldi adamǵa, sol sıaqty urlanǵan ne kepil retinde qolǵa túsirilgen adamǵa qatysty qınaý",
- 107-baptyń 2-bóligi 3-tarmaǵy "Asa qatygezdikpen, sol sıaqty kináli adamǵa dármensiz kúıde ekeni kórineý belgili ne kináli adamǵa materıaldyq jaǵynan nemese ózgeshe túrde táýeldi adamǵa qatysty densaýlyqqa qasaqana aýyrlyǵy ortasha zıan keltirý".
"...sot aıyptalýshyǵa ortasha qaýipsizdik mekemesinde túpkilikti 5 jylǵa bas bostandyǵynan aıyrý jazasyn taǵaıyndady", – dep úkimdi sýdıa oqyp berdi.
Oqıǵanyń mán-jaıy
Áleýmettik jelide ákesin uryp-soqqan er adamnyń vıdeosy tarady. Keıinirek bul derek boıynsha qylmystyq is qozǵaldy. Kúdikti ustalyp, ýaqytsha ustaý ızolátoryna qamaldy.Polısıa qarıa qaıtys bolǵannan keıin onyń ulyna qatysty qylmystyq is qozǵalǵanyn málimdedi. Sondaı-aq, marqumnyń kelinine qatysty da tergeý júrgizilip, qylmystyq is qozǵalǵan.