Qazaqstannyń birneshe óńirinde aldaǵy kúnderi aýa raıy qolaısyz bolady, dep habarlaıdy Aqshamnews.kz tilshisi.
«Qazgıdromet» sınoptıkteriniń málimetinshe, 27 qańtar, seısenbi kúni elimizdiń birqatar aımaǵynda tuman, kóktaıǵaq, qar jaýyp, boran soǵýy múmkin.
Jetisý oblysynda túnde soltústik jáne batys aýmaqtardy tuman basady. Kúndiz Alakól mańynda soltústik-shyǵystan soqqan jeldiń ekpini sekýndyna 15–20 metrge deıin kúsheıedi.
Mańǵystaý oblysynda túngi jáne tańǵy ýaqytta batys, ońtústik jáne ortalyq bólikterde tuman men kóktaıǵaq kútiledi. Oblystyń soltústik-shyǵysynda aýa temperatýrasy 20–22 gradýs aıazǵa deıin tómendeıdi. Aqtaý qalasynda da joldar taıǵaq bolýy múmkin.
Soltústik Qazaqstan oblysynda, onyń ishinde Petropavl qalasynda tuman túsedi. Osyndaı jaǵdaı Batys Qazaqstan oblysynda da baıqalyp, Oral qalasynda túnde jáne tańerteń kórý qashyqtyǵy tómendeıdi. Pavlodar oblysynyń soltústiginde de tuman kútiledi.
Abaı oblysynda aýa raıy kúrdelene túsedi. Túnde shyǵys, ońtústik jáne ortalyq aýmaqtarda qar jaýyp, boran soǵady. Kúndiz batys, soltústik jáne ortalyq óńirlerde qarly boran saqtalyp, jeldiń ekpini 15–20 m/s-qa jetýi múmkin.
Shyǵys Qazaqstan oblysynda túnde qar jaýyp, boran soǵady. Kúndiz bul qubylys batys, soltústik jáne shyǵys aýdandarda jalǵasady. Keı jerlerde tuman túsip, jel kúsheıedi.
Qyzylorda oblysynda kóktaıǵaq qaýpi joǵary. Soltústik, ońtústik jáne ortalyq aýdandarda tuman kútiledi. Qyzylorda qalasynda tańerteń jáne kúndiz joldar taıǵaq bolady.
Ulytaý, Qostanaı jáne Qaraǵandy oblystarynda qar jaýyp, tómengi boran soǵady. Kóptegen aýdandarda tuman túsedi. Aqmola oblysynyń ońtústigi men shyǵysynda azdaǵan qar jaýyp, tómengi boran kútiledi.
Mamandar júrgizýshiler men jaıaý júrginshilerdi saq bolýǵa, alys jolǵa shyqpas buryn aýa raıy boljamyn eskerýge shaqyrady.