Almaty qalasy Alatau audanyndaǵy №210 mektep-lıtseıde sońǵy qońyrau bıyl erekshe formatta ūıymdastyryldy, – dep habarlaıdy aqshamnews.kz tílshísí.
Áskerı orkestr áuenímen órílgen saltanatty sharaǵa Qazaqstan Respublıkasy Ūlttyq ūlanynyń áskerı qyzmetshílerí qatysyp, merekeníń aıryqsha sánín keltírdí. Oqu ordasymen sheftík baılanys ornatqan áskerılerdíń qatysuy túlekter úshín de, ata-analar men ūstazdar qauymy úshín de este qalarlyq sátke aınaldy.
Saltanatty jıyn Qazaqstan Respublıkasynyń Memlekettík Gımnímen ashyldy. El Ánūranyn Keńes Odaǵynyń Batyry, gvardıya polkovnıgí Bauyrjan Momyshūly atyndaǵy 5571 áskerı bólímíníń áskerı úrmelí aspaptar orkestrí oryndady. Al Memlekettík Tudy alyp shyǵu qūrmetí áskerı qyzmetshílerden jasaqtalǵan tu ūstaushy topqa beríldí. Áskerı marshtar, sap túzegen sarbazdardyń aıbyndy kelbetí men erekshe rásímder sońǵy qońyrau saltanatyna ózgeshe ruh syılady. Mūndaı formattaǵy mereke oqushylarǵa patrıottyq tárbıe beríp qana qoımaı, mektep tarıhyndaǵy jarqyn oqıǵalardyń bíríne aınaldy.
2023 jyly ashylǵan №210 mektep-lıtseıí búgínde Alatau audanyndaǵy zamanauı bílím ordalarynyń bírí sanalady. Qazírgí tańda mūnda ekí myńǵa juyq oqushy bílím alady. Bıyl mektep qabyrǵasynan 99 túlek qanat qaqqaly otyr. Tórt 11-synyp úlken ómírge joldama aldy. Būl – bílím ordasynyń tarıhyndaǵy ekínshí túlekter legí.
Mektep maqtanyshyna aınalǵan ozat oqushylardyń bírí – «Altyn belgíge» úmítker Dínmūhammed Sepbosynov. Onyń aıtuynsha, būl kún – túlekter ómíríndegí jańa kezeńníń bastauy.
– Búgín bíz úshín quanyshty da, tolqynysqa toly erekshe kún. Osy mektepte bílím alyp, ūstazdarymyzdan tálím-tárbıe kórdík, naǵyz dostar taptyq. Aldymyzda úlken jauapkershílík pen jańa belester tūr. Bolashaqta elge qyzmet etetín, halqyna paıdasyn tıgízetín maman ıesí bolǵym keledí, — deıdí túlek.
Túlekterge aq jol tílegen mektep-lıtseı dırektory Gúlnara Ahmetova búgíngí jas buynǵa úlken sením artatynyn atap óttí.
–Árbír shákírtímíz – bízdíń maqtanyshymyz. Mektebímízdíń ashylǵanyna kóp uaqyt bolmasa da, búgínde ózíndík dástúrí men jetístígí qalyptasyp keledí. Búgíngí túlekter ómírden óz oryndaryn tauyp, el bolashaǵyna úles qosatyn azamat bolady dep senemín. Olar óz mektebín árdaıym maqtan tūtady dep oılaımyn, – dedí mektep dırektory.
Áskerı orkestr súıemeldegen sońǵy qońyrau sharasy mektep ómíríndegí eń jarqyn árí taǵylymdy merekelerdíń bíríne aınaldy. Ūlttyq ūlan áskerı qyzmetshíleríníń qatysuy ís-sharanyń mańyzyn arttyryp, jas túlekterge erekshe áser men Otanǵa degen maqtanysh sezímín syılady.
Qazaqstan Respublıkasy Ūlttyq ūlany
«Ońtústík» óńírlík qolbasshylyǵynyń baspasóz qyzmetí