Almatyda 15 myńnan astam qyz bala HPV-ge qarsy vaktsına aldy, – dep habarlaıdy aqshamnews.kz tílshísí.
Almatyda adam papıllomasy vırusyna (HPV) qarsy vaktsınatsıyalau baǵdarlamasynyń auqymy keńeıíp jatyr. Nauqan bastalǵaly berí 11–13 jas aralyǵyndaǵy 15 398 qyz bala ekpe alǵan. Sonymen qatar qalada vaktsınadan keıín auyr janama áser alǵan bírde-bír adam tírkelgen joq. Óńírlík kommunıkatsıyalar qyzmetínde ótken brıfıngte Almaty onkologıyalyq ortalyǵy dırektorynyń orynbasary Raıhan Bolatbekova osylaı dedí.
Onyń aıtuynsha, baǵdarlamaǵa ata-analar sením artyp, qamtylu deńgeıí de óse bastaǵan. 2024 jyldyń sońynda vaktsınatsıyadan 5077 qyz bala ótse, byltyr būl kórsetkísh 7544-ke jetken eken. Bıylǵy qańtar-mamyr aıy aralyǵynda taǵy 2777 jasóspírím ekpe alǵan.
«Baqylau uaqyty aralyǵynda Almatyda auyr janama áser alǵan bírde-bír adam tírkelgen joq. Būl qoldanylyp jatqan vaktsınanyń tolyq qauípsíz ekenín dálel bola alady», — dep atap óttí Raıhan Bolatbekova.
Spıkerdíń aıtuynsha, 2026 jyldyń mamyr aıynda Qazaqstanda 14 jastan 17 jas 11 aı 29 kúnge deıíngí jasóspírím qyzdarǵa arnalǵan qosymsha vaktsınatsıyalau jūmysy resmı túrde bastaldy. Vaktsınatsıya ata-ananyń nemese zańdy ókílderdíń jazbasha kelísímímen eríktí túrde júrgízíledí.
Ekpe mektepterdíń, kolledjderdíń medıtsınalyq kabınetí men aumaqtyq emhanalarda ūıymdastyrylǵan.
Brıfıng barysynda HPV-ge qarsy vaktsınatsıyalauǵa baılanysty qańqu sózge de nazar audardy. Mamandardyń aıtuynsha, eń jıí kezdesetín jalǵan píkírdíń bírí — vaktsınanyń bedeulíkke alyp keletíní turaly aqparat bolyp shyqqan.
«HPV-ge qarsy vaktsına bedeulíkke alyp keledí degen píkír — ǵylymı tūrǵyda joqqa shyǵarylǵan jalǵan aqparat. Kerísínshe, vaktsına jatyr moıny obyrynan qorǵaı otyryp, reproduktıvtík densaulyqty saqtauǵa kómektesedí», — dep túsíndírdí Raıhan Bolatbekova.
Sondaı-aq spıker vaktsına qūramynda tírí vırus joq ekenín jáne onyń auru tuǵyzbaıtynyn atap óttí. Vaktsınatsıya jynystyq ómír bastalǵanǵa deıín jasalǵan jaǵdaıda barynsha tıímdí sanalady, óıtkení dál osy kezeńde ımmundyq júıe eń kúshtí qorǵanys qalyptastyrady eken.
Almaty onkologıyalyq ortalyǵynyń málímetínshe, skrınıngtík baǵdarlamalar men profılaktıkanyń ūlǵayuynyń arqasynda qalada jatyr moıny obyry men obyrǵa deıíngí jaǵdaıdy erte anyqtau kórsetkíshí artqan.
Almatyda jyl saıyn jatyr moıny obyryn erte anyqtauǵa arnalǵan skrınıngten 90 myńnan astam áıel ótedí. 2025 jyly osy dıagnozben 179 patsıent esepke alynǵan, olardyń 60%-dan astamynda auru bírínshí satysynda anyqtaldy.
«Qazírgí zamanǵy skrınıng búgínde áıelderdíń ómírín saqtap qaluǵa kómektesíp jatyr, al vaktsınatsıya bolashaq ūrpaqty qorǵauǵa múmkíndík beredí», — dep qorytyndylady sózín spıker.