Almatyda jańa formattaǵy emhana salynady, – dep habarlaıdy aqshamnews.kz tílshísí.
Bír auysymda 500 adam qabyldaı alatyn densaulyq saqtau nysany «Shūǵyla» shaǵynaudanynda ornalasqan. Būl Nauryzbaı audanynyń qarqyndy ósíp kele jatqan tūrǵyndary úshín medıtsınalyq kómektíń qoljetímdílígín arttyruǵa múmkíndík beredí. Joba Almatynyń densaulyq saqtau júıesín keshendí damytu baǵdarlamasy ayasynda qolǵa alynǵan.
Ǵımarattyń jalpy aumaǵy 12,7 myń sharshy metr bolady. Emhana úsh qabatty. Mūnda pedıatrıya, terapıya, hırurgıya bólímderí, áıelder konsultatsıyasy, kúndízgí statsıonar jáne ońaltu ortalyǵy qarastyrylǵan.
Qalalyq qūrylys basqarmasynyń málímetínshe, nysan ozyq medıtsınalyq tehnıkamen jabdyqtalady. Emhanada MRT, KT, mammografıya, rentgen kabınetterí jáne avtomattandyrylǵan zerthana bólímshesí jūmys ísteıdí.
Joba barysynda kelushílerge qolaıly orta qalyptastyruǵa erekshe mán berílgen. Balalar men eresekterge arnalǵan kíreberíster bólek jasalyp, būl patsıentter legín tıímdí ūıymdastyruǵa jáne kezektí azaıtuǵa múmkíndík beredí. Sonymen qatar múmkíndígí shekteulí azamattarǵa arnalǵan pandustar men jedelsatylar ornatylady.
Qazírgí tańda qūrylys-montaj jūmystarynyń shamamen 40 paıyzy ayaqtalǵan. Nysan qūrylysy josparǵa saı júrgízílude. Sonymen bírge írgeles aumaqty kórkeıtu jáne kógaldandyru jūmystary qatar atqarylyp jatyr. Emhanany 2026 jyly qarasha aıynda paıdalanuǵa beru josparlanǵan.